🎓 उद्योग–शैक्षणिक समन्वयातून कौशल्याधारित शिक्षणाला चालना – कुलगुरू डॉ. प्रशांत बोकारे

लोकदर्शन 👉मोहन भारती

राजुरा : बदलत्या काळात विद्यार्थ्यांना रोजगारक्षम बनवण्यासाठी शैक्षणिक संस्था आणि उद्योग यांच्यातील समन्वय अत्यंत आवश्यक असून, या माध्यमातून कौशल्याधिष्ठित शिक्षणाला चालना मिळेल, असे प्रतिपादन गोंडवाना विद्यापीठाचे कुलगुरू डॉ. प्रशांत बोकारे यांनी केले.

गडचिरोली येथील गोंडवाना विद्यापीठ आणि अंबुजा औद्योगिक प्रशिक्षण संस्था, उपरवाही (गडचांदूर) यांच्या संयुक्त विद्यमाने ‘इंडस्ट्री–अकॅडमीया संबंध’ या विषयावर चर्चासत्र आयोजित करण्यात आले होते. या कार्यक्रमाला विद्यापीठाचे नवोउपक्रम व संशोधन विभागाचे संचालक डॉ. मनीष उत्तरवार, व्यवस्थापन परिषदेचे सदस्य डॉ. संजय गोरे, अंबुजा आयटीआयचे प्राचार्य प्रमोद खडसे, डॉ. संजय कुमार सिंह, तसेच उद्योग क्षेत्रातील मान्यवर उपस्थित होते.

कुलगुरू डॉ. बोकारे यांनी सांगितले की, विद्यार्थ्यांना पदवीनंतर त्वरित रोजगार मिळावा यासाठी अभ्यासक्रमांमध्ये कौशल्याधारित शिक्षणाचा समावेश करणे काळाची गरज आहे. गोंडवाना विद्यापीठाने यासाठी पुढाकार घेतला असून सर्व शाखांमध्ये कौशल्याधारित अभ्यासक्रम राबवण्याचा मानस आहे. तसेच विद्यापीठाच्या परिक्षेत्रातील शैक्षणिक संस्था, औद्योगिक प्रशिक्षण संस्था आणि उद्योग यांच्यात प्रभावी समन्वय साधला जाणार आहे.

कार्यक्रमात डॉ. मनीष उत्तरवार यांनी ‘इंडस्ट्री–अकॅडमीया’ संकल्पनेचे सादरीकरण केले, तर प्राचार्य प्रमोद खडसे यांनी संस्थेच्या वाटचालीबाबत माहिती दिली. प्रास्ताविक डॉ. संजय गोरे यांनी केले आणि संचालन डॉ. शरद बेलोरकर यांनी केले.

यावेळी कुलगुरू डॉ. प्रशांत बोकारे यांचा अंबुजा आयटीआयतर्फे सत्कार करण्यात आला. तसेच नागपूर विभागात उत्कृष्ट संस्था म्हणून सन्मानित झाल्याबद्दल प्राचार्य प्रमोद खडसे यांचा विद्यापीठातर्फे गौरव करण्यात आला.

कार्यक्रमाला परिसरातील विविध आयटीआय आणि महाविद्यालयांचे प्राचार्य, प्राध्यापक आणि शिक्षक मोठ्या संख्येने उपस्थित होते. अंबुजा प्रशिक्षण संस्थेच्या शिक्षकांच्या प्रयत्नांमुळे कार्यक्रम यशस्वीरीत्या पार पडला. स्नेहभोजनानंतर कार्यक्रमाची सांगता झाली.