📰 गोंडवाना विद्यापीठ यंग टीचर्स असोसिएशनची मागणी: गडचांदूर येथे उत्तरपत्रिका संकलन केंद्र सुरू करा

लोकदर्शन गडचांदूर 👉मोहन भारती

गडचांदूर (प्रतिनिधी): गोंडवाना विद्यापीठ यंग टीचर्स असोसिएशन यांच्या वतीने गडचांदूर येथे विद्यापीठ परीक्षा उत्तरपत्रिका संकलन केंद्र सुरू करण्याची मागणी करण्यात आली आहे. यासंदर्भात गोंडवाना विद्यापीठ चे कुलगुरू डॉ. प्रशांत बोकारे, प्र-कुलगुरू डॉ. श्रीराम कावळे आणि परीक्षा व मूल्यमापन मंडळाचे संचालक डॉ. धनराज पाटील यांना निवेदन देण्यात आले.

संघटनेचे अध्यक्ष डॉ. संजय गोरे व सचिव डॉ. विवेक गोरलावार यांच्या नेतृत्वाखाली हे निवेदन सादर करण्यात आले. यावेळी व्यवस्थापन परिषद सदस्य गुरुदासजी कामडी उपस्थित होते.

गडचांदूर परिसरात विदर्भ महाविद्यालय जिवती, राजीव गांधी महाविद्यालय पाटण, प्रभाकर मामुलकर महाविद्यालय कोरपना, शरदराव पवार महाविद्यालय गडचांदूर आणि महात्मा गांधी महाविद्यालय गडचांदूर अशी एकूण पाच परीक्षा केंद्रे कार्यरत आहेत. सध्या या सर्व केंद्रांवरील उत्तरपत्रिका चंद्रपूर येथे जमा केल्या जातात.

मात्र या केंद्रांपासून चंद्रपूरचे अंतर सुमारे 60 ते 95 किलोमीटर असल्याने वाहतूक, वेळ आणि सुरक्षिततेच्या दृष्टीने मोठ्या अडचणी निर्माण होत आहेत. विशेषतः जिवती येथील केंद्रावर उत्तरपत्रिकांची संख्या अधिक असून, खराब रस्ते आणि अपुरी बससेवा यामुळे उत्तरपत्रिका मोटारसायकलने नेण्याची वेळ येते, जे धोकादायक ठरत आहे.

तसेच पाटण, कोरपना आणि गडचांदूर येथील केंद्रांनाही अशाच समस्यांना सामोरे जावे लागत आहे. वाढते अंतर, उन्हाळ्याची तीव्रता, उष्माघाताचा धोका आणि अपघाताची शक्यता लक्षात घेता गडचांदूर येथे उत्तरपत्रिका संकलन केंद्र सुरू करणे अत्यावश्यक असल्याचे संघटनेने नमूद केले आहे.

संघटनेच्या या मागणीमुळे परीक्षा व्यवस्थापन अधिक सुरक्षित, सोयीस्कर आणि कार्यक्षम होईल, असा विश्वास व्यक्त करण्यात आला आहे.