🟦 “जिवतीत भीमजयंती उत्साहात: समतेच्या वाटचालीचा नवा संकल्प – आमदार देवराव दादा भोंगळे”

लोकदर्शन जिवती 👉मोहन भारती

जिवती : भारतीय राज्यघटनेचे शिल्पकार, सामाजिक न्यायाचे महानायक डॉ. बाबासाहेब आंबेडकर यांच्या १३५ व्या जयंतीनिमित्त जिवती येथील डॉ. बाबासाहेब आंबेडकर स्मारक परिसरात भीमजयंती उत्सव मोठ्या उत्साहात साजरा करण्यात आला. फुले-शाहू-आंबेडकर स्मारक समितीच्या वतीने आयोजित या कार्यक्रमात आमदार देवराव दादा भोंगळे प्रमुख उपस्थित होते.

कार्यक्रमाची सुरुवात ध्वजारोहणाने करण्यात आली. यावेळी आमदार भोंगळे यांच्या हस्ते बाबासाहेबांच्या पुतळ्याला पुष्पहार अर्पण करण्यात आला तसेच संविधानाच्या उद्देशिकेचे वितरण करण्यात आले.

आपल्या मनोगतात आमदार भोंगळे यांनी सांगितले की, “ज्ञानसूर्य डॉ. आंबेडकर यांच्या विचारांनी प्रेरित होऊन समाजातील शेवटच्या घटकापर्यंत न्याय पोहोचवणे हेच आमचे ध्येय आहे.”

यावेळी त्यांनी जिवती येथील स्मारकाच्या सौंदर्यीकरणासाठी विशेष निधी देण्याची घोषणा केली. तसेच यापूर्वी येल्लापूर येथे पुतळा परिसरासाठी १५ लाख रुपये आणि गोंडपिपरी तालुक्यातील धाबा येथे रस्त्याच्या बांधकामासाठी २० लाख रुपये निधी दिल्याचेही त्यांनी नमूद केले.

बाबासाहेबांनी अत्यंत प्रतिकूल परिस्थितीत शिक्षणाच्या बळावर अन्याय आणि विषमतेविरुद्ध लढा देत देशाला समता, स्वातंत्र्य आणि बंधुतेचा पाया दिला. “शिका, संघटित व्हा आणि संघर्ष करा” हा त्यांचा संदेश आजही प्रेरणादायी असल्याचे त्यांनी यावेळी सांगितले.

कार्यक्रमाला फुले-शाहू-आंबेडकर समितीचे अध्यक्ष निशिकांतजी सोनकांबळे, नबिलास भगत, व्यंकटी कांबळे, भाजयुमो जिल्हाध्यक्ष महेश देवकते, तालुकाध्यक्ष दत्ता राठोड, केशव गिरमाजी, नगराध्यक्षा अनुसया राठोड, उपनगराध्यक्ष जमालुद्दीन शेख, तसेच अनेक नगरसेवक, पदाधिकारी, कार्यकर्ते आणि मोठ्या संख्येने भीम अनुयायी उपस्थित होते.

या उत्सवातून समताधिष्ठित समाज निर्माण करण्याचा दृढ संकल्प उपस्थितांनी व्यक्त केला.