🟧 “कुलथा हनुमान देवस्थानाला ५० लाखांचा ‘संजीवनी’ निधी: आमदार देवराव भोंगळे यांच्या पाठपुराव्याला मोठे यश”

लोकदर्शन 👉मोहन भारती

गोंडपिपरी, दि. १४: पवित्र वैनगंगा नदीच्या तीरावर वसलेल्या कुलथा (ता. गोंडपिपरी) येथील प्रसिद्ध हनुमान देवस्थानाच्या सर्वांगीण विकासासाठी राज्य शासनाने ५० लाख रुपयांच्या निधीस प्रशासकीय मान्यता दिली आहे. या महत्त्वपूर्ण निर्णयामागे आमदार देवराव भोंगळे यांच्या सातत्यपूर्ण पाठपुराव्याला यश आले आहे.

चंद्रपूर व गडचिरोली जिल्ह्यांतील हजारो भाविकांचे श्रद्धास्थान असलेले कुलथा येथील हनुमान मंदिर हे अत्यंत जागृत व पवित्र स्थळ म्हणून ओळखले जाते. निसर्गरम्य वैनगंगा नदीच्या पात्रालगत असल्याने येथे धार्मिक तसेच पर्यटनाच्या दृष्टीने मोठ्या प्रमाणात भाविकांची वर्दळ असते. मात्र, आवश्यक सोयी-सुविधांच्या अभावामुळे दर्शनार्थींना अनेक अडचणींना सामोरे जावे लागत होते.

ही बाब लक्षात घेऊन आमदार भोंगळे यांनी प्रादेशिक पर्यटन विकास योजनेअंतर्गत या देवस्थानाचा विकास करण्यासाठी विशेष प्रयत्न केले. त्यांच्या पाठपुराव्यामुळे शासनाने या प्रकल्पाला मंजुरी देत ५० लाख रुपयांचा निधी मंजूर केला आहे.

या निधीतून मंदिर परिसराचे सौंदर्यीकरण, भाविकांसाठी विश्रांती कक्ष, स्वच्छ पिण्याच्या पाण्याची व्यवस्था तसेच इतर आवश्यक पायाभूत सुविधांची उभारणी केली जाणार आहे.

या निर्णयामुळे कुलथा परिसरात आनंदाचे वातावरण निर्माण झाले असून धार्मिक पर्यटनाला चालना मिळणार आहे. तसेच स्थानिक अर्थव्यवस्थेलाही बळकटी मिळणार आहे.

“नागरिकांच्या श्रद्धेचा सन्मान राखत मतदारसंघातील तीर्थक्षेत्रांचा विकास करणे हे आमचे प्राधान्य आहे,” अशी भावना आमदार देवराव भोंगळे यांनी व्यक्त केली.

दोन जिल्ह्यांच्या सीमेवर असलेल्या या महत्त्वाच्या देवस्थानाचा आता लवकरच कायापालट होणार असल्याने भाविकांमध्ये समाधानाचे वातावरण आहे.