🛕 “आमदार देवराव भोंगळे यांच्या विशेष प्रयत्नाने गंगामाता मंदिरासाठी १ कोटींचा निधी मंजूर” 🛕

लोकदर्शन जिवती 👉मोहन भारती

जिवती, दि. १२:एप्रिल 2026
दुर्गम जिवती तालुक्यातील भाविकांचे श्रद्धास्थान असलेल्या माराईपाटण येथील गंगामाता मंदिराच्या विकासासाठी राज्य शासनाने १ कोटी रुपयांच्या निधीला प्रशासकीय मान्यता दिली आहे. प्रादेशिक पर्यटन विकास योजनेअंतर्गत मंजूर झालेला हा निधी मंदिर परिसराच्या सर्वांगीण विकासासाठी महत्त्वपूर्ण ठरणार आहे. या कामासाठी देवराव भोंगळे यांच्या सातत्यपूर्ण पाठपुराव्याचे हे फलित मानले जात आहे.

माराईपाटण येथील गंगामाता मंदिराचे धार्मिक महत्त्व संपूर्ण चंद्रपूर जिल्ह्यात विशेष मानले जाते. चंद्रपूर येथील माता महाकाली यात्रेनंतर जिल्ह्यातील दुसऱ्या क्रमांकाची मोठी यात्रा म्हणून या यात्रेची ओळख आहे. दरवर्षी होळीच्या दुसऱ्या दिवसापासून सुरू होणाऱ्या या यात्रेसाठी महाराष्ट्रासह तेलंगणा राज्यातूनही हजारो भाविक मोठ्या श्रद्धेने उपस्थित राहतात.

भाविकांची वाढती संख्या लक्षात घेता मंदिर परिसरात मूलभूत सुविधांची आवश्यकता भासत होती. याच पार्श्वभूमीवर या निधीतून पिण्याच्या पाण्याची व्यवस्था, स्वच्छतागृहे, निवास सुविधा तसेच इतर पायाभूत सुविधा उभारल्या जाणार आहेत.

या निर्णयामुळे दुर्गम भागातील या पवित्र तीर्थक्षेत्राचा कायापालट होणार असून, जिवती तालुक्यातील धार्मिक पर्यटनाला नवी चालना मिळणार आहे. स्थानिक नागरिक आणि भाविकांनी या निर्णयाबद्दल समाधान व्यक्त करत आमदार देवराव भोंगळे यांचे आभार मानले आहेत.