🔴 नारी सशक्तीकरण वर्षानिमित्त गडचांदूर येथे भव्य गायत्री महायज्ञ व दीप महायज्ञ सोहळ्याचे आयोजन 🔴

लोकदर्शन गडचांदूर :👉मोहन भारती

नारी सशक्तीकरण वर्षाच्या पार्श्वभूमीवर, परम पूज्य गुरुदेव पंडित श्रीराम शर्मा आचार्य व वंदनीय माता भगवती देवी शर्मा यांच्या सूक्ष्म संरक्षणाखाली अखिल विश्व गायत्री परिवार, शाखा गडचांदूर यांच्या वतीने ६, ७ व ८ फेब्रुवारी २०२६ रोजी तीन दिवसीय भव्य आध्यात्मिक महोत्सवाचे आयोजन करण्यात आले आहे.

या पावन प्रसंगी श्री माता कन्यका परमेश्वरी मंदिर, वॉर्ड नं. ५, गडचांदूर येथे ९ कुंडीय गायत्री महायज्ञ, प्रज्ञा पुराण कथा, संकल्प दीप महायज्ञ, मंगल कलश शोभायात्रा, संगीत-प्रवचन व विविध संस्कार विधी संपन्न होणार आहेत.

कार्यक्रमाच्या पहिल्या दिवशी भव्य मंगल कलश यात्रा व कथा प्रारंभ, दुसऱ्या दिवशी देवपूजनासह गायत्री महायज्ञ व प्रज्ञा पुराण कथा, तर तिसऱ्या दिवशी महायज्ञाची पूर्णाहुती, टोळी विदाई व विशेष संस्कार विधी पार पडणार आहेत.

या यज्ञातून वैचारिक क्रांती, श्रद्धा संवर्धन, पर्यावरण संरक्षण तसेच शारीरिक-मानसिक शांतीचा संदेश देण्यात येणार असून, सामूहिक यज्ञ परंपरेतून समाजात सुसंस्कारांचे बीजारोपण होईल, असा विश्वास आयोजकांनी व्यक्त केला आहे.

परिसरातील भाविकांनी कुटुंबीयांसह या पुण्यप्रद आयोजनात सहभागी होऊन आध्यात्मिक लाभ घ्यावा, असे आवाहन अखिल विश्व गायत्री परिवार, गडचांदूर यांच्या वतीने करण्यात आले आहे.