📰 विवेक बोढे यांच्या नेतृत्वात ‘एप्रिल फुल’ आंदोलन; घुग्घुस नगर परिषदेविरोधात भाजपचा जोरदार निषेध

लोकदर्शन घुग्घुस 👉 शिवाजी सेलोकर

घुग्घुस (प्रतिनिधी): भारतीय जनता पक्ष नगरसेवकांनी घुग्घुस नगर परिषदेविरोधात बुधवार, २९ एप्रिल रोजी दुपारी १:३० वाजता ‘एप्रिल फुल’ आंदोलन करत जोरदार निषेध नोंदवला.

नगर परिषद कार्यालयात झालेल्या या आंदोलनात सत्ताधाऱ्यांविरोधात तीव्र नारेबाजी करण्यात आली. चार महिने उलटूनही एकही ठोस विकासकाम न झाल्याचा आरोप करत, शहरवासियांना “एप्रिल फुल” बनवले जात असल्याचा संताप व्यक्त करण्यात आला.

यावेळी नगरसेवक विवेक बोढे यांनी नगर परिषदेवर गंभीर आरोप करत सांगितले की, शहराच्या विकासासाठी आवश्यक असलेला ६ कोटींचा निधी शासनाकडे परत गेला आहे. तसेच आरो मशीन बंद आहेत, नवीन कामगारांची भरती झालेली नाही, पथदिवे बंद आहेत, हातपंप दुरुस्ती प्रलंबित आहे आणि स्वच्छतेकडे दुर्लक्ष होत आहे.

नगरसेवकांच्या म्हणण्यानुसार, मासिक सभा वेळेवर घेतल्या जात नाहीत, त्यामुळे नागरिकांच्या समस्या कायम प्रलंबित राहत आहेत. या सर्व प्रश्नांवर प्रशासनाने तातडीने लक्ष द्यावे, या मागणीसाठी हे आंदोलन करण्यात आले.

आंदोलनादरम्यान ‘एप्रिल फुल बनाया’ हे गाणे वाजवत मुख्याधिकाऱ्यांना प्रतीकात्मक ‘एप्रिल फुल’ देण्यात आले.

या आंदोलनात गटनेत्या मिना मोरपाका, निरीक्षण तांड्रा, वैशाली ढवस, चैताली सातपुते यांच्यासह अनेक नगरसेवक, पदाधिकारी व कार्यकर्ते मोठ्या संख्येने उपस्थित होते.