📰 भाजपची विकासगंगा घराघरांत पोहोचवा – आमदार देवराव भोंगळे

लोकदर्शन 👉 मोहन भारती

गडचांदूर, दि. १२ — केंद्र व राज्य सरकारच्या माध्यमातून राबविण्यात येणाऱ्या लोककल्याणकारी योजना समाजातील शेवटच्या घटकापर्यंत प्रभावीपणे पोहोचवणे हे प्रत्येक कार्यकर्त्याचे कर्तव्य आहे. कार्यकर्त्यांनी जनतेचा विश्वास संपादन करून भाजपची विकासगंगा घराघरांत पोहोचवावी, असे आवाहन आमदार देवराव भोंगळे यांनी केले.

गडचांदूर येथील बालाजी सेलिब्रेशन हॉलमध्ये पंडित दीनदयाल उपाध्याय प्रशिक्षण महाभियानांतर्गत कोरपना ग्रामीण मंडळाच्या दोन दिवसीय निवासी प्रशिक्षण कार्यशाळेचा समारोप कार्यक्रम उत्साहात पार पडला. यावेळी ते प्रमुख मार्गदर्शक म्हणून बोलत होते.

आपल्या भाषणात आमदार भोंगळे यांनी ‘अंत्योदय’ या संकल्पनेचा उल्लेख करत, समाजातील सर्वात शेवटच्या घटकापर्यंत विकास पोहोचवण्याचा भाजपचा निर्धार अधोरेखित केला. कार्यकर्त्यांनी केवळ निवडणुकांपुरते मर्यादित न राहता वर्षभर जनतेच्या समस्या सोडवण्यासाठी सक्रिय राहावे, असे त्यांनी स्पष्ट केले.

तसेच बूथ व्यवस्थापन बळकट करणे, संघटनात्मक रचना सक्षम करणे आणि शासकीय योजनांची माहिती तळागाळातील नागरिकांपर्यंत पोहोचवण्यासाठी नियोजनबद्ध कार्य करण्याचे आवाहन त्यांनी यावेळी केले.

या कार्यक्रमाला भाजपचे जिल्हा महामंत्री विवेक बोढे, कोरपना तालुकाध्यक्ष संजय मुसळे, एसआयआर अभियान प्रमुख सतीश उपलेंचवार, महामंत्री पुरुषोत्तम भोंगळे, आदिवासी आघाडीचे जिल्हाध्यक्ष अरुण मडावी, तसेच विविध पदाधिकारी व कार्यकर्ते मोठ्या संख्येने उपस्थित होते.

कार्यशाळेच्या यशस्वी आयोजनामुळे कार्यकर्त्यांमध्ये नवचैतन्य निर्माण झाले असून, आगामी काळात संघटन अधिक मजबूत करण्याचा निर्धार यावेळी व्यक्त करण्यात आला.