📰 आमदार देवराव दादा भोंगळे यांच्या मार्गदर्शनाखाली लक्कडकोटमध्ये सर्विस रोडविरोधात जोरदार आंदोलन

लोकदर्शन 👉मोहन भारती

लक्कडकोट, दि. 11 एप्रिल 2026 — येथील सर्विस रोडच्या उंचीमुळे नागरिकांना होत असलेल्या गंभीर समस्यांच्या पार्श्वभूमीवर आज लक्कडकोटमध्ये मोठ्या प्रमाणावर धरना आंदोलन करण्यात आले. हे आंदोलन आमदार देवराव दादा भोंगळे यांच्या मार्गदर्शनाखाली पार पडले.

या आंदोलनाचे नेतृत्व श्रीनिवास उटन्नुरवार, मनोज गनपत मून, रवि ठाकूर, शंकर राठोड आणि भारत चव्हाण या भाजपा कार्यकर्त्यांनी केले. सकाळी 9 वाजता लक्कडकोट मुख्य रस्त्यावर आंदोलनास सुरुवात झाली.

सध्या गावातून जाणाऱ्या राष्ट्रीय महामार्गाच्या कामासोबत सर्विस रोडचे बांधकाम सुरू आहे. मात्र, या रस्त्याची उंची सुमारे 12 ते 15 फूट वाढवल्यामुळे स्थानिक नागरिकांना मोठ्या अडचणींचा सामना करावा लागत आहे. बैलगाड्या तसेच इतर वाहने चालवणे कठीण झाले असून, रस्त्यालगतच्या घरांमध्ये व दुकानांमध्ये ये-जा करण्यासही अडथळे निर्माण झाले आहेत. याशिवाय, पावसाचे पाणी गावात शिरण्याचा धोका देखील वाढला आहे.

आंदोलनकर्त्यांनी प्रशासनासमोर काही ठोस मागण्या मांडल्या. त्यामध्ये सर्विस रोडचे काम तात्काळ थांबवून त्याची उंची कमी करणे तसेच पावसाच्या पाण्यासाठी योग्य नाली व्यवस्था करणे या प्रमुख मागण्या होत्या.

हे आंदोलन जी.आर. इन्फा कंपनी आणि नॅशनल हायवे प्राधिकरणाच्या विरोधात करण्यात आले. आंदोलनादरम्यान संतप्त नागरिकांनी जी.आर. कंपनीचे काम बंद पाडले आणि त्यांच्या वाहनांनाही अडवून धरले.

सायंकाळी सुमारे 6 वाजता संबंधित कंपनी व प्राधिकरणाचे पदाधिकारी आंदोलनस्थळी दाखल झाले. त्यांनी आंदोलनकर्त्यांशी चर्चा करून काही महत्त्वाचे निर्णय जाहीर केले. त्यानुसार, सर्विस रोडची उंची वरिष्ठांच्या मार्गदर्शनाखाली कमी करण्यात येणार असून, सध्या टाकलेली माती तात्काळ हटविण्यात येईल.

तसेच, भविष्यात पुन्हा अशी समस्या निर्माण झाल्यास अधिक तीव्र आंदोलन छेडण्याचा इशाराही नागरिकांनी दिला.

सायंकाळी 7 वाजता आंदोलनाची सांगता करण्यात आली.
या आंदोलनात गावातील मोठ्या संख्येने नागरिकांनी सहभाग नोंदवला.