🩺 “जनतेला सर्वोत्तम आरोग्यसेवा देण्यासाठी कटिबद्ध” — आमदार सुधीर मुनगंटीवार ♦️कळमना येथे ₹२ कोटी ६८ लाख खर्चून उभारलेल्या स्मार्ट प्राथमिक आरोग्य केंद्राचे भव्य उद्घाटन

लोकदर्शन बल्लारपूर 👉मोहन भारती

राज्याचे माजी वने, सांस्कृतिक कार्य आणि मत्स्यव्यवसाय मंत्री तथा आमदार श्री. सुधीर मुनगंटीवार यांच्या प्रयत्नांमुळे बल्लारपूर तालुक्यातील कळमना येथे जिल्हा खनिज प्रतिष्ठान अंतर्गत ₹२ कोटी ६८ लाख २९ हजार ८५० रुपये खर्चून उभारण्यात आलेल्या “स्मार्ट प्राथमिक आरोग्य केंद्राचे” उद्घाटन सोमवार, दि. १० नोव्हेंबर २०२५ रोजी त्यांच्या हस्ते संपन्न झाले.

या प्रसंगी आमदार मुनगंटीवार यांनी जनतेच्या आरोग्यसेवेप्रती असलेली आपली बांधिलकी व्यक्त करत सांगितले की, “गोरगरिब, शेतकरी आणि सर्वसामान्य नागरिकांना उत्तम व सुलभ आरोग्यसेवा देण्यासाठी मी कटिबद्ध आहे. आपल्या जिल्ह्यातील आरोग्यसेवा इतर जिल्ह्यांसाठी आदर्श ठरावी, हा माझा प्रयत्न आहे.”

🏥 आरोग्यसेवेत नवा अध्याय — ३१ प्राथमिक केंद्रांचे स्मार्ट रूपांतर

आमदार मुनगंटीवार म्हणाले, “चंद्रपूर जिल्ह्यातील ६५ प्राथमिक आरोग्य केंद्रांपैकी पहिल्या टप्प्यात १४ नवीन केंद्रे उभारली असून, दुसऱ्या टप्प्यात ३१ केंद्रांना स्मार्ट आरोग्य केंद्राचे रूप दिले आहे. ही केंद्रे खासगी दवाखान्यांपेक्षा अधिक सुसज्ज आणि आधुनिक आहेत. गरिबांसाठी खरी सेवा म्हणजे उत्तम आरोग्यसेवा,” असेही त्यांनी नमूद केले.

👩‍⚕️ महिलांच्या आरोग्यासाठी “पिंक ओपीडी” उपक्रम

महिलांच्या आरोग्याच्या संदर्भात त्यांनी सांगितले की, “महिलांमध्ये कर्करोगाचे प्रमाण वाढत आहे. योग्यवेळी निदान झाले तर अनेक जीव वाचू शकतात. त्यामुळे सर्वायकल कॅन्सर लसीकरणासाठी मी विधानसभेत मागणी केली असून, आरोग्यमंत्री यांनी १४ वर्षांच्या मुलींपासून या लसीकरणाची सुरुवात करण्याचा शब्द दिला आहे.”
तसेच, ‘पिंक ओपीडी’ ही महिलांसाठी स्वतंत्र आरोग्यसेवा व्यवस्था सुरू करण्याचा प्रस्ताव सरकारला पाठवला असून, त्यास मंजुरी मिळाल्यास चंद्रपूर हा कोल्हापूरनंतरचा दुसरा जिल्हा ठरेल, अशी माहिती त्यांनी दिली.

🏗️ उत्तम आरोग्य केंद्रांची उभारणी — उमरी पोतदार व मानोरा विशेष उदाहरण

उमरी पोतदार येथे ८ कोटी ७५ लाख २५ हजार रुपये खर्चून उभारलेल्या सुसज्ज प्राथमिक आरोग्य केंद्राचे अलीकडेच उद्घाटन झाले असून, हे केंद्र अत्याधुनिक सोयींनी सुसज्ज आहे.

मानोरा प्राथमिक आरोग्य केंद्राला विशेष बाब म्हणून मंजुरी मिळवून दिल्याचेही आमदारांनी विशेषत्वाने नमूद केले.

🧬 कॅन्सरविरोधी पायाभूत सुविधा — चंद्रपूर जिल्ह्याची आरोग्यदृष्टी

आमदार मुनगंटीवार यांनी सांगितले की,

₹२८० कोटींच्या १४० खाटांच्या टाटा कॅन्सर हॉस्पिटलचे उद्घाटन २२ डिसेंबरला होणार आहे.

देशातील पहिले हेलियमविरहित MRI मशीन चंद्रपूरच्या टाटा कॅन्सर हॉस्पिटलमध्ये उपलब्ध असेल.

जानेवारी महिन्यात चंद्रपूर मेडिकल कॉलेजचे उद्घाटन केंद्रीय गृहमंत्री अमित शहा यांच्या हस्ते होणार आहे.

तसेच, ₹१.५ कोटींची कॅन्सर निदान वॅन जिल्ह्यात उपलब्ध करून देण्यात आली असून, कॅन्सर तपासणी शिबिरे देखील सुरू आहेत.

🚁 राज्यातील पहिला हेलिपॅड असलेला मेडिकल कॉलेज — चंद्रपूरचा अभिमान

महाराष्ट्रातील शासकीय वैद्यकीय महाविद्यालयांमध्ये हेलिकॉप्टर ॲम्बुलन्ससाठी हेलिपॅडची सुविधा असलेले चंद्रपूर हे एकमेव महाविद्यालय असल्याचे आमदारांनी सांगितले