🌼 गडचांदूरात वर्षावास समारोप आणि धम्मचक्र प्रवर्तन दिनाचा भव्य सोहळा* *♦️धम्मप्रकाशात उजळली बुद्धभूमी; समाजएकतेचा संदेश झळकला!*

लोकदर्शन 👉अशोककुमार भगत

गडचांदूर (प्रतिनिधी) —दिनांक11ऑक्टोबर 2025
भारतीय बौद्ध महासभा तालुका शाखा व सम्यक संबोधी बहुउद्देशीय बौद्ध मंडळाच्या संयुक्त विद्यमाने बोरकर नगर (वार्ड क्र. ६) येथील सम्यक संबोधी बुद्ध विहारात वर्षावास समारोप आणि ६९ वा धम्मचक्र प्रवर्तन दिन उत्साहात साजरा करण्यात आला.

गडचांदूर ही प्राचीन बुद्धभूमी म्हणून ओळखली जाते. माणिकगड परिसरातील सम्राट अशोककालीन बुद्धविहारांचे अवशेष या भूमीचा ऐतिहासिक वारसा सांगतात. त्यामुळे या पवित्र भूमीत साजऱ्या झालेल्या या सोहळ्याने बौद्ध अनुयायांमध्ये अध्यात्मिक उर्जा आणि समाजजागृतीचा नवा संदेश दिला.

सकाळपासूनच विहार परिसर फुलांच्या सजावटीने उजळला होता. पंचशील ध्वज फडकावून धम्मप्रबोधन सत्रास सुरुवात झाली. चार आर्य सत्य, अष्टांगिक मार्ग आणि सम्यक जीवनपद्धती यावर विद्वान भिक्खू आणि प्रबोधकांनी मार्गदर्शन केले.

कार्यक्रमाचे अध्यक्षस्थान प्राचार्य डॉ. सोमाजी गोंडाणे यांनी भूषवले. आपल्या अध्यक्षीय भाषणात त्यांनी सांगितले, “बाबासाहेबांच्या शिकवणींचा सार म्हणजे सम्यक मार्ग — जो प्रत्येकाच्या आयुष्यात शांतता, समता आणि प्रज्ञेचा दीप लावतो.”

प्रमुख पाहुणे प्रा. डॉ. हेमचंद दुधगवळी यांनी धम्मक्रांतीच्या सामाजिक परिणामांवर प्रकाश टाकत म्हटले की, “बाबासाहेबांनी दिलेला धम्ममार्ग हा आजही सामाजिक न्यायाची गुरुकिल्ली आहे.”

या प्रसंगी नगरसेवक राहुल उमरे, दशरथजी डांगे, प्रा. किर्तीकुमार करमनकर, दिव्यकुमार बोरकर, प्रा. प्रशांत खैरे, कैलास म्हैस्के, मारोतराव लोखंडे, प्रा. माधुरी उके आणि रवी ताकसांडे यांनी आधुनिक जीवनातील धम्माच्या उपयुक्ततेवर विचार मांडले.

सभागृहात विश्वनाथ पाईकराव, बबन सुर्यतळ, मारोती राऊत, शांताबाई अभंगे, अशोक पाटील, प्रभाकर जगताप, मधुकर खाडे, गोमाजी सोनवणे, बाबाराव अभंगे, उत्तम अभंगे, गणेश साखरे यांसह बौद्ध अनुयायांचा मोठा सहभाग होता.

कार्यक्रम यशस्वीतेसाठी भारतीय बौद्ध महासभेचे तालुका अध्यक्ष बौद्धाचार्य श्रावण जिवणे, नितेश रंगारी आणि त्यांच्या टीमने अथक प्रयत्न केले. सामूहिक भोजनदानाने सोहळ्याची सांगता झाली.

हा समारंभ बौद्ध समाजाच्या ऐक्याचे प्रतीक ठरला असून, गडचांदूरसारख्या छोट्या शहरातही धम्माचा प्रकाश तेजाने झळकत असल्याचे दृश्य प्रेरणादायी ठरले.