📰 आंबेडकर जयंतीपूर्वी घुग्घुसमधील बंद हायमास्ट लाईट सुरू करा – विवेक बोढे यांची मागणी

लोकदर्शन 👉शिवाजी सेलोकर

घुग्घुस : Dr. Babasaheb Ambedkar Jayanti निमित्त १४ एप्रिलपूर्वी शहरातील सर्व बंद असलेले हायमास्ट लाईट व पथदिवे तात्काळ सुरू करण्यात यावेत, अशी मागणी भाजपा नगरसेवक विवेक बोढे यांनी नगर परिषदेकडे केली आहे.

घुग्घुस हे औद्योगिक दृष्ट्या महत्त्वाचे शहर असून येथे सुमारे ५० हजारांच्या आसपास लोकसंख्या वास्तव्यास आहे. विविध जाती, धर्म व भाषिक नागरिकांसह मोठ्या प्रमाणात कामगार वर्ग येथे राहतो.

शहरात एकूण ११ प्रभाग असून अनेक ठिकाणी रस्त्यांवरील हायमास्ट लाईट व पथदिवे बंद अवस्थेत आहेत. त्यामुळे रात्रीच्या वेळी नागरिकांना, विशेषतः महिला व कामगार वर्गाला ये-जा करताना मोठ्या अडचणींचा सामना करावा लागत आहे.

दरवर्षीप्रमाणे १४ एप्रिल रोजी डॉ. बाबासाहेब आंबेडकर जयंतीनिमित्त शहरातून भव्य मिरवणूक काढण्यात येते. मात्र सध्या अनेक ठिकाणी दिवे बंद असल्याने मिरवणुकीत सहभागी होणाऱ्या नागरिकांना त्रास होण्याची शक्यता आहे.

ही बाब लक्षात घेता, नगर परिषद प्रशासनाने तात्काळ दखल घेत जयंतीपूर्वी सर्व बंद हायमास्ट लाईट व पथदिवे सुरू करावेत, अशी ठाम मागणी विवेक बोढे यांनी केली आहे.