🌿 राजुरा येथे वनपरिक्षेत्र अधिकारी कार्यालय व जोगापूर वन पर्यटन सफारीचे उद्घाटन

लोकदर्शन राजुरा 👉मोहन भारती

राजुरा : मध्य चांदा वनविभाग अंतर्गत येणाऱ्या राजुरा येथील नवीन वनपरिक्षेत्र अधिकारी कार्यालय तसेच जोगापूर वन पर्यटन सफारीचे उद्घाटन दि. ८ रोजी उत्साहात पार पडले.

राजुरा येथील वनपरिक्षेत्र अधिकारी कार्यालयाची इमारत अत्याधुनिक सोयीसुविधांनी सुसज्ज करण्यात आली असून या कार्यालयामुळे वनविभागाच्या कामकाजात अधिक सुसूत्रता येणार आहे. तसेच नागरिकांना त्यांच्या समस्या अधिक प्रभावीपणे मांडण्याची सुविधा उपलब्ध होणार आहे.

यासोबतच जोगापूर वन पर्यटन सफारी हा उपक्रम या भागातील पर्यटनासाठी महत्त्वाचा ठरणार आहे. या सफारीमुळे पर्यटकांना वन्यजीवांचे जवळून दर्शन घेण्याची संधी मिळणार असून स्थानिक युवकांना रोजगाराच्या नवीन संधी उपलब्ध होणार आहेत. वन्यजीव संरक्षणाच्या दृष्टीने सर्व नियमांचे पालन करून पर्यटनाचा आनंद घ्यावा, असे आवाहन यावेळी करण्यात आले.

या कार्यक्रमाला उपवनसंरक्षक योगेश वाघाये, विभागीय वन अधिकारी मंगेश गिरडकर, भाजपाचे जिल्हा महामंत्री विवेक बोढे, राजुरा तालुकाध्यक्ष वामन तुराणकर, शहराध्यक्ष सुरेश रागीट, वनपरिक्षेत्र अधिकारी गजानन इंगळे, शहर महामंत्री सचिन भोयर, नगरसेवक प्रफुल कावळे, भाजयुमो शहराध्यक्ष प्रफुल घोटेकर, तसेच उमेश गोरे, अमोल मोरे, वैभव पावडे, शिवा बोंकुर, किशोर रागीट, विवेक राठोड यांच्यासह वनविभागाचे अधिकारी व कर्मचारी मोठ्या संख्येने उपस्थित होते.