🌟 शरदराव पवार महाविद्यालयात तीन दिवसीय रोजगार क्षमता कौशल्य विकास प्रशिक्षण शिबिर संपन्न

लोकदर्शन 👉मोहन भारती

गडचांदूर Sharadrao Pawar Arts and Commerce College, Gadchandur येथे गुणवत्ता हमी कक्ष व समाजशास्त्र विभागाच्या वतीने बी.ए. अंतिम वर्षाच्या विद्यार्थिनींसाठी दिनांक २४ ते २६ फेब्रुवारी २०२६ दरम्यान तीन दिवसीय रोजगार क्षमता कौशल्य विकास प्रशिक्षण शिबिराचे आयोजन करण्यात आले.

या शिबिराच्या उद्घाटन व अध्यक्षस्थानी महाविद्यालयाचे प्राचार्य डॉ. संजय कुमार सिंह हे होते. प्रमुख अतिथी म्हणून गुणवत्ता हमी कक्षाचे समन्वयक डॉ. संजय गोरे, समाजशास्त्र विभाग प्रमुख डॉ. माया मसराम, डॉ. हेमचंद दूधगवळी, डॉ. शरद बेलोरकर आदी मान्यवर उपस्थित होते. तज्ञ मार्गदर्शक म्हणून पुणे येथील श्रीकांत चंदनगिरी यांनी विद्यार्थिनींना मार्गदर्शन केले.

श्रीकांत सुंदरगिरी यांनी पदवी संपादनानंतर रोजगार मिळविण्यासाठी आवश्यक असलेल्या मुलाखत कौशल्यांबाबत सविस्तर माहिती दिली. विविध रोजगार संधी, मुलाखतीसाठी आवश्यक तयारी, आत्मविश्वास वाढविण्याच्या पद्धती तसेच इंटरव्यूतील प्रश्नोत्तरांची घटकनिहाय तयारी याविषयी त्यांनी अभ्यासपूर्ण मार्गदर्शन केले. विद्यार्थिनींचे गट तयार करून प्रत्यक्ष कृतीद्वारे विविध कौशल्यांचा सरावही करून घेतला.

प्राचार्य डॉ. संजय कुमार सिंह यांनी आपल्या अध्यक्षीय भाषणात शिबिराचे महत्त्व विशद करताना, अशा प्रशिक्षणामुळे विद्यार्थिनींच्या व्यक्तिमत्त्व विकासासोबतच रोजगार संधी वाढण्यास मोठी मदत होते, असे मत व्यक्त केले. प्रस्ताविकातून डॉ. संजय गोरे यांनी शिबिर आयोजनामागील उद्दिष्ट स्पष्ट केले.

कार्यक्रमाचे संचालन डॉ. माया मसराम यांनी केले, तर आभार प्रदर्शन प्रा. उज्वला जानवे यांनी मानले. शिबिराच्या समारोपप्रसंगी तज्ञ मार्गदर्शक श्रीकांत चंदनगिरी यांचा महाविद्यालयाच्या वतीने शाल, श्रीफळ व सन्मानचिन्ह देऊन गौरव करण्यात आला.

तीन दिवसीय प्रशिक्षणानंतर सहभागी विद्यार्थिनींना प्रमाणपत्रांचे वितरण करण्यात आले. हे प्रशिक्षण पूर्ण केलेल्या विद्यार्थिनींना पदवीप्राप्तीनंतर विविध कंपन्यांमध्ये रोजगार संधी उपलब्ध होण्यास निश्चितच मदत होणार असल्याचे मत उपस्थितांनी व्यक्त केले. कार्यक्रमास महाविद्यालयातील प्राध्यापक, शिक्षकेतर कर्मचारी व विद्यार्थिनी मोठ्या संख्येने उपस्थित होते.