*🗳️ **”स्ट्राँग रूमला हॅकिंगपासून संरक्षणासाठी जॅमरची तातडीची मागणी”*

लोकदर्शन राजुरा👉मोहन भारती

**राजुरा (10डिसेंबर)** — नगर परिषद व नगर पंचायत निवडणुकांचे मतदान पार पडूनही मतमोजणी पुढे ढकलल्यामुळे EVM मशीनच्या सुरक्षिततेबाबत जनतेत संभ्रम व चिंता वाढली आहे. दिनांक २ डिसेंबर २०२५ रोजी मतदान झाल्यानंतर उच्च न्यायालयाच्या आदेशानुसार ३ डिसेंबरऐवजी २१ डिसेंबर रोजी मतमोजणी होणार असल्याने स्ट्राँग रूमच्या दीर्घ सुरक्षेचा प्रश्न अधिक गंभीर झाला आहे.

देशभरात होणाऱ्या मत चोरी व EVM हॅकिंगच्या चर्चेमुळे नागरिकांच्या मनात इलेक्ट्रॉनिक मतमोजणी प्रक्रियेबाबत संशयाचे वातावरण आहे. सॅटेलाइट अथवा मोबाईल इंटरनेटद्वारे होणाऱ्या हस्तक्षेपाची भीती व्यक्त केली जात असून यावर प्रभावी नियंत्रणाची गरज भासू लागली आहे.

या पार्श्वभूमीवर काँग्रेसचे जिल्हाध्यक्ष व माजी आमदार **सुभाष धोटे** यांनी जिल्हाधिकारी तसेच जिल्हा निवडणूक अधिकाऱ्यांना निवेदन देऊन स्ट्राँग रूम परिसरात जॅमर बसवण्याची तातडीची मागणी केली आहे. नागरिकांचा मतदान प्रक्रियेवरील विश्वास अबाधित राखण्यासाठी अत्याधुनिक सुरक्षा उपाययोजना करण्याचे आवाहन त्यांनी प्रशासनास केले.