*🌹 उच्च शिक्षण विकासात प्राचार्याची भूमिका अत्यंत महत्त्वाची – आमदार सुधाकर अडबाले * *♦️शरदराव पवार महाविद्यालयात प्राचार्य सभा व चर्चासत्राचे यशस्वी आयोजन*

लोकदर्शन👉मोहन भारती

गडचांदूर :–– “महाविद्यालयीन शिक्षणाच्या गुणवत्तावाढीसाठी प्राचार्य हा संस्था, विद्यापीठ आणि प्रशासन यांच्यातील दुवा आहे. मात्र, शासनाच्या अलीकडील विविध धोरणांमुळे प्राचार्यांना अनेक प्रशासकीय अडचणींना सामोरे जावे लागत आहे. या अडचणींचे निराकरण करण्यासाठी मी प्रयत्नशील राहीन,” असे प्रतिपादन आमदार सुधाकर अडबाले यांनी केले.

गोंडवाना विद्यापीठ प्राचार्य फोरम आणि शरदराव पवार कला वाणिज्य महाविद्यालय, गडचांदूर यांच्या संयुक्त विद्यमाने प्राचार्य सभा व चर्चासत्राचे आयोजन करण्यात आले होते. या कार्यक्रमाच्या अध्यक्षस्थानी सरस्वती शिक्षण प्रसारक मंडळाचे अध्यक्ष डॉ. आनंदराव अडबाले होते.

प्रमुख अतिथी म्हणून प्राचार्य फोरमचे अध्यक्ष डॉ. प्रमोद काटकर, सचिव डॉ. लालसिंग खालसा, उपाध्यक्ष डॉ. एस. एन. बुटे, सहसचिव डॉ. संभाजी वरकड, संयोजन सचिव व सहसचिव डॉ. संजयकुमार सिंह आदी मान्यवर उपस्थित होते.

कार्यक्रमाच्या प्रारंभी आमदार अडबाले यांचा मानपत्र देऊन, तर इतर अतिथींचा शाल, श्रीफळ, बांबू शिल्प व दुपट्टा देऊन महाविद्यालयाच्या वतीने सत्कार करण्यात आला.

प्रास्ताविकात प्राचार्य डॉ. संजयकुमार सिंह यांनी महाविद्यालयातील रिक्त पदे, वर्कलोड, शिक्षकेतर कर्मचाऱ्यांची भरती, विद्यार्थ्यांची गळती आणि नवीन शैक्षणिक धोरणातील अडचणी यांवर प्रकाश टाकला.

प्राचार्य फोरमचे अध्यक्ष डॉ. प्रमोद काटकर यांनी फोरमच्या विविध उपक्रमांची माहिती दिली तसेच उच्च शिक्षणासमोरील समस्यांबाबत आमदार अडबाले यांना अवगत केले. अध्यक्षीय भाषणात डॉ. आनंदराव अडबाले यांनी संस्थाचालकांच्या सहकार्याचे महत्त्व अधोरेखित केले.

या प्रसंगी गोंडवाना विद्यापीठ परीक्षेत्रातील सेवानिवृत्त व नवनियुक्त प्राचार्यांचा फोरमच्या वतीने शाल, श्रीफळ व सन्मानचिन्ह देऊन गौरव करण्यात आला.

दुसऱ्या सत्रात प्राचार्यांच्या विविध समस्यांवर सखोल चर्चा करण्यात आली. कार्यक्रमाचे संचालन डॉ. संजय गोरे यांनी केले, तर आभार गो.बा. महाविद्यालयाचे प्राचार्य संजय सिंह यांनी मानले. आमदार महोदयांच्या मानपत्राचे वाचन डॉ. शरद बेलोरकर यांनी केले.

या कार्यक्रमाला सरस्वती शिक्षण प्रसारक मंडळाचे संचालक मंडळ, गोंडवाना विद्यापीठ परीक्षेत्रातील विविध महाविद्यालयांचे प्राचार्य मोठ्या संख्येने उपस्थित होते. कार्यक्रमाची सांगता स्नेहभोजनाने झाली.

या आयोजनाच्या यशस्वीतेसाठी अल्ट्राटेक सिमेंट माणिकगड वर्क्स तसेच शरदराव पवार महाविद्यालयातील सर्व प्राध्यापक व शिक्षकेतर कर्मचारी यांनी मोलाचे योगदान दिले.