📰 डॉ. आकाश जिवणे यांना जातीवाचक शिवीगाळ व जीवे मारण्याची धमकी; देरकर बंधूंविरुद्ध गुन्हा दाखल

✍🏻 लोकदर्शन कोरपना 👉 : अशोककुमार भगत |

कोरपना ग्रामीण रुग्णालयाचे वैद्यकीय अधिकारी डॉ. आकाश जिवणे (वय ४५) यांना जागेच्या वादातून सचिन शांताराम देरकर आणि सुनील शांताराम देरकर या दोघा भावांनी जातीवाचक शिवीगाळ करीत “जेसीबीखाली दाबून मारून टाकू” अशी धमकी दिल्याची धक्कादायक घटना समोर आली आहे. या प्रकरणी कोरपना पोलीस ठाण्यात दोघांविरुद्ध गंभीर स्वरूपाचा गुन्हा दाखल करण्यात आला असून आरोपी अद्याप फरार असल्याने पोलीस प्रशासनाच्या कार्यक्षमतेवर प्रश्नचिन्ह निर्माण झाले आहे.

घटनेचा सविस्तर आढावा :
डॉ. आकाश जिवणे आणि त्यांच्या पत्नी डॉ. राजश्री जिवणे हे गेल्या आठ वर्षांपासून कोरपना येथील सर्वे क्र. ३२/०१, प्लॉट नं. १२ येथे वास्तव्यास आहेत. डॉ. राजश्री यांचा खाजगी दवाखाना देखील याच घरात चालतो. या घरासमोरून जाणाऱ्या शासकीय जागेचा वापर रुग्ण आणि त्यांच्या कुटुंबीयांकडून वाहतुकीसाठी नियमित केला जातो.

२ जुलै रोजी आरोपी देरकर बंधूंनी शेजारच्या प्लॉट नं. ११ वर जेसीबी व ट्रॅक्टरच्या साहाय्याने खोदकाम सुरू केले. या खोदकामात शासकीय जागेचाही समावेश असल्याने जिवणे दाम्पत्य व दवाखान्यात येणाऱ्या रुग्णांच्या वाहतुकीस अडथळा निर्माण झाला. याबाबत विचारणा केली असता आरोपींनी डॉ. आकाश यांना जातीवाचक शिवीगाळ केली आणि जिवे मारण्याची धमकी दिली.

गुन्ह्याची नोंद :
डॉ. जिवणे यांच्या तक्रारीनंतर कोरपना पोलिसांनी भारतीय दंड संहितेच्या (BNS) कलम १२६(२), २९६, ३५२, ३५१(३), तसेच अनुसूचित जाती-जमाती अत्याचार प्रतिबंधक कायद्यानुसार कलम ३(५), ३(१)(r), ३(१)(s) आणि ३(२) अंतर्गत गुन्हा दाखल केला आहे.

पोलिसांवर संशयाची सुई :
घटना घडून चार दिवस उलटून गेले असतानाही आरोपी फरार असून पोलिसांकडून कोणतीही ठोस कारवाई झालेली नाही. परिणामी स्थानिक नागरिक आणि वैद्यकीय क्षेत्रात असंतोषाचे वातावरण असून, पोलिसांच्या तपासावर संशय निर्माण झाला आहे.

➡️ डॉ. जिवणे यांना न्याय मिळावा आणि आरोपींना तात्काळ अटक व्हावी, अशी मागणी नागरिकांमधून जोर धरत आहे.