🗳️ गडचांदूरमध्ये महाआघाडीची जोरदार एन्ट्री! ♦️काँग्रेस–शिवसेना (उ.बा.ठा.)–वंचित बहुजन आघाडी एकत्र; राष्ट्रवादी (शरद पवार) गटासाठीही दार खुले

लोकदर्शन 👉मोहन भारती

गडचांदूर | ८ नोव्हेंबर २०२५

गडचांदूर नगरपरिषद निवडणुकीत भाजपला रोखण्यासाठी विरोधकांनी हातमिळवणी केली आहे. काँग्रेस, शिवसेना (उद्धव बाळासाहेब ठाकरे) आणि वंचित बहुजन आघाडी या तिन्ही पक्षांनी एकत्र येत महाआघाडीची घोषणा केली असून स्थानिक राजकारणात नव्या समीकरणांना सुरुवात झाली आहे.

आज झालेल्या पत्रकार परिषदेत शिवसेनेचे जिल्हाप्रमुख संदीप गिऱ्हे, काँग्रेसचे तालुका अध्यक्ष उत्तम पेचे, आणि वंचित बहुजन आघाडीचे जिल्हा सल्लागार मधुकर चुनारकर यांनी या युतीची औपचारिक घोषणा केली.

“जनतेच्या प्रश्नांकडे दुर्लक्ष करणाऱ्या सत्ताधाऱ्यांना धडा शिकवण्यासाठी आम्ही एकत्र आलो आहोत. गडचांदूरचा सर्वांगीण विकास, युवकांना रोजगाराच्या संधी आणि नागरिकांसाठी सुविधा निर्माण करणे हेच आमचे ध्येय आहे,” असे तिन्ही नेत्यांनी स्पष्ट केले.

युतीच्या नेत्यांनी पुढे सांगितले की, राष्ट्रवादी काँग्रेस (शरदचंद्र पवार गट) या आघाडीत सामील होऊ इच्छित असल्यास त्यांचे मनःपूर्वक स्वागत केले जाईल. “महाविकास आघाडीच्या विचारसरणीवर आम्ही ठाम असून सर्व लोकशाहीवादी शक्तींनी एकत्र यावे,” असेही नेत्यांनी नमूद केले.

या घोषणेमुळे गडचांदूर नगरपरिषद निवडणुकीतील राजकीय रंगत वाढली आहे. तिन्ही पक्षांच्या एकजुटीमुळे स्थानिक पातळीवर भाजपसमोर कठीण आव्हान उभे राहण्याची शक्यता व्यक्त केली जात आहे.

पत्रकार परिषदेला शिवसेना (उ. बा. ठा.) गटाचे जिल्हाप्रमुख संदीप गिऱ्हे, काँग्रेसचे तालुका अध्यक्ष उत्तमराव पेचे, वंचित बहुजन आघाडीचे जिल्हा सल्लागार मधुकर चुनारकर, शिवसेनेचे विधानसभा प्रमुख सागर ठाकूरवार, काँग्रेसचे ज्येष्ठ नेते विठ्ठलराव थिपे, काँग्रेस शहराध्यक्ष संतोष महाडोळे, आणि वंचित बहुजन आघाडीचे शहर प्रमुख प्रशिक रामटेके उपस्थित होते.