🎓 “विचारांच्या प्रकाशात उजळलेले शिक्षक” — प्रा. प्रशांत खैरे यांना राज्यस्तरीय गुणवंत शिक्षक पुरस्कार जाहीर 🌟

लोकदर्शन 👉अशोककुमार भगत

गडचांदूर : सावित्रीबाई फुले कनिष्ठ महाविद्यालय, गडचांदूर येथील प्राध्यापक, कवी आणि आंबेडकरी विचारवंत प्रा. प्रशांत खैरे यांना त्यांच्या शैक्षणिक, साहित्यिक आणि सामाजिक कार्यातील उल्लेखनीय योगदानाबद्दल “राष्ट्रपिता महात्मा ज्योतिराव फुले राज्यस्तरीय सत्यशोधक गुणवंत शिक्षक पुरस्कार” जाहीर झाला आहे.

हा पुरस्कार राष्ट्रीय मूलनिवासी बहुजन कर्मचारी संघ, नवी दिल्ली अंतर्गत PROTAN (Professor, Teacher and Non-Training) या संघटनेच्या वतीने प्रदान करण्यात येणार असून, रविवार, 12 ऑक्टोबर 2025 रोजी क्रांतीज्योती सावित्रीबाई फुले सभागृह, गंजपेठ, पुणे येथे पार पडणाऱ्या समारंभात प्रदान केला जाईल.

या कार्यक्रमाला मा. वामन मेश्राम (राष्ट्रीय अध्यक्ष, मूलनिवासी बहुजन कर्मचारी संघ, नवी दिल्ली) यांच्या अध्यक्षतेखाली मा. विक्रम काळे (शिक्षक आमदार, औरंगाबाद), मा. किरण राव सरनाईक (शिक्षक आमदार, अमरावती), प्रा. डॉ. व्ही. डी. मोरे (उपसंचालक, उच्च शिक्षण संचालनालय, पुणे) आणि मा. राजेंद्र आंधळे (राज्य समन्वयक, म.रा. माध्य. व उच्च माध्य. शिक्षण मंडळ, पुणे) यांची प्रमुख उपस्थिती लाभणार आहे.

प्रा. प्रशांत खैरे हे सामाजिक आणि परिवर्तनवादी कवी म्हणून ओळखले जातात. त्यांच्या लेखणीतून शिव, फुले, शाहू आणि आंबेडकर यांच्या विचारांची तेजस्वी परंपरा झळकते. “मला श्वास घेता येत नाही” या त्यांच्या काव्यसंग्रहाला अनेक राष्ट्रीय आणि आंतरराष्ट्रीय पुरस्कार प्राप्त झाले आहेत. शेतकरी आत्महत्या, भारतीय संविधान आणि स्त्रीभ्रूणहत्या यांसारख्या विषयांवर त्यांनी प्रभावी नाट्यलेखन केले असून, विद्यार्थ्यांच्या माध्यमातून गावागावात समाजप्रबोधनाचा दीप प्रज्वलित केला आहे.

प्रा. खैरे यांच्या या यशाबद्दल संस्थाध्यक्ष डॉ. आनंदरावजी अडबाले, प्राचार्य महेंद्रकुमार ताकसांडे, सर्व संचालक मंडळ, कर्मचारीवृंद, विद्यार्थी आणि परिसरातील मान्यवरांनी हार्दिक अभिनंदन व्यक्त केले आहे.

📘 “विचारांची ज्योत जागवत शिक्षणाचा दीप पेटवणारे शिक्षक — प्रा. प्रशांत खैरे यांना मनःपूर्वक सलाम!”