🌿 ‘वन्यजीव सप्ताह २०२५’ उत्साहात साजरा — निसर्ग संवर्धनाचा संदेश विद्यार्थ्यांपर्यंत पोहोचवला 🌳

✍️उरण 👉 विठ्ठल ममताबादे, लोकदर्शन सकारात्मक लोकजागर

उरण (दि. ९):
पी. पी. खारपाटील एज्युकेशन सोसायटीचे ठकूबाई परशुराम खारपाटील इंग्लिश मिडीयम स्कूल आणि ज्युनिअर कॉलेज, चिरनेर (उरण, रायगड) येथे महाराष्ट्र शासन वनविभाग, अलिबाग वनपरीक्षेत्र उरण आणि फ्रेंड्स ऑफ नेचर (FON) सर्पमित्र निसर्गसंवर्धन संस्था, चिरनेर यांच्या संयुक्त विद्यमाने वन्यजीव सप्ताह २०२५ (Wildlife Week 2025) उत्साहात साजरा करण्यात आला.

या उपक्रमांतर्गत विद्यार्थ्यांसाठी वन्यजीव छायाचित्र प्रदर्शन आणि वन्यजीव पुस्तक प्रदर्शन आयोजित करण्यात आले होते. फॉन संस्थेच्या स्वयंसेवकांनी घेतलेल्या छायाचित्रांमध्ये विविध विषारी आणि बिनविषारी साप, तसेच पक्षी, कीटक, उभयचर, पतंग, फुलपाखरे आणि इतर वन्यजीवांचे अप्रतिम क्षणचित्रे प्रदर्शित करण्यात आली.

कार्यक्रमात उपस्थितांना वनविभागाचे कार्य, परिसंस्थेचे महत्त्व आणि अन्नसाखळीची रचना याबद्दल सविस्तर माहिती देण्यात आली. वन्यजीवांचे मानवी जीवनातील स्थान आणि त्यांचे प्रत्यक्ष-अप्रत्यक्ष फायदे स्पष्ट करून विद्यार्थ्यांना वन्यजीव संरक्षण, वृक्ष लागवड आणि निसर्ग संवर्धनाचे आवाहन करण्यात आले.

या प्रसंगी फॉन संस्थेचे सदस्य आणि वन्यजीव अभ्यासक निकेतन रमेश ठाकूर यांनी विद्यार्थ्यांना वन्यजीव संरक्षणाबाबत मार्गदर्शन केले. तसेच वन्यजीव छायाचित्रकार मनीष कदम यांनी चित्रित केलेला “रायगड जिल्ह्याचा तिबोटी खंड्या (Black-necked Dwarf Kingfisher)” या पक्ष्यावर आधारित माहितीपट दृकश्राव्य माध्यमातून सादर करण्यात आला.

कार्यक्रमाचे उद्दिष्ट राष्ट्रीय शैक्षणिक धोरणानुसार (NEP 2020) विद्यार्थ्यांना प्रत्यक्ष निसर्ग आणि वन्यजीव संवर्धनाचा अनुभव देणे हे होते. अशा उपक्रमांमुळे विद्यार्थ्यांच्या मनात पर्यावरण जागृती, निसर्गप्रेम आणि संरक्षणाची मूल्ये रुजवली जातात, असे आयोजकांनी सांगितले.

या कार्यक्रमाला सुमारे २०० विद्यार्थी, शिक्षकवृंद, शिक्षकेतर कर्मचारी तसेच उरण वनविभागाचे वनरक्षक उपस्थित होते.

🌱 “निसर्ग आपला गुरु — त्याचं संरक्षण आपली जबाबदारी” या संदेशासह वन्यजीव सप्ताह २०२५ साजरा करण्यात आला.