🔥 राजुर्यात महाविकास आघाडीचा हल्लाबोल : जनसुरक्षा विधेयकाच्या विरोधात संयुक्त धरणे आंदोलन

लोकदर्शन. राजुरा 👉 मोहन भारती

राजुरा दिनांक 10सप्टेंबर :– महाराष्ट्र शासनाने प्रस्तावित केलेले “महाराष्ट्र जनसुरक्षा विधेयक २०२४” हे अन्यायकारक, लोकशाहीविरोधी व नागरिकांच्या मूलभूत स्वातंत्र्यावर गदा आणणारे असल्याचा आरोप करत राजुर्यात महाविकास आघाडी आक्रमक झाली.

संविधान चौकातील महामानव भारतरत्न डॉ. बाबासाहेब आंबेडकर यांच्या पुतळ्यासमोर काँग्रेस, राष्ट्रवादी काँग्रेस (शरदचंद्र पवार गट), शिवसेना (उद्धव बाळासाहेब ठाकरे गट), कम्युनिस्ट पक्ष व महाविकास आघाडीच्या वतीने संयुक्त धरणे आंदोलन छेडण्यात आले.

आंदोलनकर्त्यांनी नागरिकांना उद्देशून सांगितले की, या विधेयकामुळे अभिव्यक्ती स्वातंत्र्य धोक्यात येईल, गोपनीयतेचा भंग होईल आणि संविधानाने दिलेल्या नागरी हक्कांवर आघात होईल. विशेषतः चंद्रपूर–गडचिरोलीसारख्या संवेदनशील जिल्ह्यांमध्ये पोलिस नियंत्रणाच्या नावाखाली पत्रकार, सामाजिक कार्यकर्ते आणि विरोधी मतधारकांवर अन्यायकारक कारवाया होण्याची भीती व्यक्त करण्यात आली. त्यामुळे हा कायदा तातडीने रद्द करण्याची मागणी जोरदारपणे करण्यात आली.

या प्रसंगी काँग्रेसचे जिल्हाध्यक्ष माजी आमदार सुभाषभाऊ धोटे, माजी नगराध्यक्ष अरुणभाऊ धोटे, तालुकाध्यक्ष रंजन लांडे, शिवसेनेचे तालुकाप्रमुख बबन उरकुडे, राष्ट्रवादीचे तालुकाध्यक्ष आशिफ सय्यद, माजी नगराध्यक्ष स्वामी येरोलवार, सभापती विकास देवाळकर, ॲड. अरूण धोटे यांच्यासह महाविकास आघाडीतील मान्यवर, पदाधिकारी, कार्यकर्ते आणि नागरिक मोठ्या संख्येने उपस्थित होते.