🔴 कामावर असताना कंत्राटी कामगाराचा मृत्यू; नातेवाईकांचा कंपनीसमोर ठिय्या आंदोलन; १६ लाखांची मदत व नोकरीचा निर्णय

लोकदर्शन👉मोहन भारती
गडचांदूर :
अल्ट्राटेक सिमेंट कंपनीच्या आवाळपूर युनिटमध्ये मंगळवारी सकाळी एक दुर्दैवी घटना घडली. सुभाष फुलचंद शेंडे (३५, रा. गणेश नगर, नांदा) हे प्रेरणा कॉन्ट्रॅक्टरमार्फत कंत्राटी पद्धतीने काम करत असताना अचानक सीसीआर कॅन्टीनजवळ चक्कर येऊन कोसळले. तातडीने त्यांना कंपनीच्या खाजगी दवाखान्यात दाखल करण्यात आले. त्यानंतर प्रकृती अधिक बिघडल्यामुळे त्यांना चंद्रपूर व नंतर नागपूर येथील रुग्णालयात हलविण्यात आले. मात्र सर्व प्रयत्न निष्फळ ठरले आणि आज सकाळी त्यांचे निधन झाले.

कामगार कुटुंबीयांचा संताप; प्रवेशद्वारासमोर ठिय्या आंदोलन

कामावर असताना मृत्यू झाल्याने संतप्त नातेवाईकांनी कंपनीच्या प्रवेशद्वारासमोर मृतदेह ठेवून ठिय्या आंदोलन सुरू केले. त्यांनी तातडीने आर्थिक मदत व कुटुंबातील एका सदस्याला नोकरीची मागणी केली. यामुळे परिसरात तणावाचे वातावरण निर्माण झाले होते. मोठ्या संख्येने कामगार जमा झाले होते. पोलिस बंदोबस्तात कंपनी परिसर सील करण्यात आला.

श्रमिक संघटनांच्या पुढाकाराने सामोपचाराने सोडवला वाद

एल अँड टी कामगार संघटनेचे अध्यक्ष नरेश पुगलिया व कार्याध्यक्ष शिवचंद्र काळे यांच्या पुढाकाराने उद्योग प्रमुख श्रीराम पी. एस. यांच्या उपस्थितीत कंपनी व्यवस्थापन व कुटुंबीयांमध्ये चर्चा झाली. रात्री उशिरा दोन्ही पक्षांमध्ये समजुता झाली व आंदोलन मागे घेण्यात आले. यावेळी आशिष देरकर, अभय मुनोत, प्रकाश बोरकर, हारुन सिद्दीकी, उमेश राजुरकर, शैलेश लोखंडे आदी उपस्थित होते.

कुटुंबाला १६ लाखांची मदत व नोकरी

समजुतेनुसार मृतकाच्या कुटुंबाला खालीलप्रमाणे मदत जाहीर करण्यात आलीः

आर्थिक मदतीसाठी १५ लाख रुपयांचा धनादेश

अंत्यविधी खर्चासाठी १ लाख रुपयांची मदत

संपूर्ण वैद्यकीय खर्च कंपनीकडून

सप्लाय विभागात कुटुंबातील एका सदस्याला तातडीने नोकरी

पीएफ व विमा योजनांतून ४-५ लाख रुपयांची अतिरिक्त मदत

एकूण मिळून कुटुंबाला सुमारे २० लाख रुपयांची मदत व स्थायिक नोकरी मिळणार आहे. या घटनेमुळे परिसरात हळहळ व्यक्त आहे