📰 नवी मुंबई आंतरराष्ट्रीय विमानतळ नामकरणासाठी २४ जूनपासून जासई येथे भूषण पाटील यांचे आमरण उपोषण नोटीफिकेशन न काढल्यास कायदा-सुव्यवस्थेचा प्रश्न निर्माण होईल – शासनाला इशारा

लोकदर्शन उरण👉विठ्ठल ममताबादे

उरण, दि. ६ (विठ्ठल ममताबादे):
नवी मुंबई आंतरराष्ट्रीय विमानतळाला लोकनेते दिवंगत दि.बा. पाटील यांचे नाव देण्याबाबतची अधिसूचना (नोटीफिकेशन) तात्काळ जाहीर करण्यात यावी, या प्रमुख मागणीसाठी कॉम्रेड भूषण पाटील यांनी २४ जून २०२५ (दि.बा. पाटील यांचा १२ वा स्मृतीदिन) पासून जासई येथे आमरण उपोषण सुरू करण्याचा निर्धार व्यक्त केला आहे.

जासई हे दिवंगत लोकनेते दि.बा. पाटील यांचे जन्मगाव असून, याच गावातील हायस्कूलसमोर पुतळ्यासमोर उपोषण होणार आहे. कॉम्रेड भूषण पाटील हे जेएनपीटीचे माजी विश्वस्त व कामगार नेते म्हणून ओळखले जातात.

सन २०२० पासून नवी मुंबई आंतरराष्ट्रीय विमानतळाच्या नामकरणासाठी सुरू असलेल्या संघर्षात आता जनतेचा संयम सुटत चालल्याचे चित्र आहे. या नावासाठी महाराष्ट्र विधानसभा दोन वेळा ठराव करून केंद्र सरकारकडे शिफारसही पाठवली आहे. मात्र आजतागायत अधिसूचना निघालेली नाही. या विलंबामुळे जनतेमध्ये तीव्र असंतोष पसरला आहे.

उद्घाटनासाठी वारंवार तारखा – आश्वासनांवर आश्वासने
१७ एप्रिल, १५ मे, आता १५ ऑगस्ट २०२५ अशी उद्घाटनासाठी तारीख नंतर तारीख जाहीर होत आहे, मात्र नावाची अधिकृत अधिसूचना मात्र अजूनही जाहीर झालेली नाही. त्यामुळे “घोषणा झाली पण नोटीफिकेशन नाही”, अशी लोकांची भावना आहे.

कॉम्रेड भूषण पाटील यांचा इशारा
कॉम्रेड भूषण पाटील यांनी स्पष्ट शब्दांत सांगितले आहे की, २३ जून २०२५ पर्यंत नावकरणाबाबत अधिसूचना न निघाल्यास, २४ जूनपासून आमरण उपोषण सुरू होईल. कायदा-सुव्यवस्थेचा प्रश्न निर्माण झाल्यास त्यास महाराष्ट्र शासन जबाबदार असेल, असा इशाराही त्यांनी दिला आहे.

त्यांनी यासंदर्भात गृह मंत्रालय (भारत सरकार), मुख्यमंत्री कार्यालय, नागरी उड्डाण मंत्री, सिडको, जिल्हाधिकारी रायगड, पोलीस प्रशासन यांच्यासह संबंधित सर्व यंत्रणांना पत्रव्यवहाराद्वारे कळवले आहे.

प्रमुख मागण्या :
🔹 विमानतळाला लोकनेते दि.बा. पाटील यांचे नाव द्यावे
🔹 नावकरणाची अधिसूचना तात्काळ जाहीर करावी
🔹 प्रकल्पग्रस्त, स्थानिक व विस्थापितांना प्रशिक्षण व रोजगार द्यावा

“मागण्या पूर्ण होईपर्यंत स्वस्थ बसणार नाही!”
कॉम्रेड भूषण पाटील यांनी जाहीर केले आहे की, मागण्या पूर्ण होईपर्यंत ते उपोषण सोडणार नाहीत. जासई परिसरात या पार्श्वभूमीवर खळबळ आहे, आणि जनतेतून प्रशासनाने याकडे गांभीर्याने लक्ष द्यावे अशी जोरदार मागणी उठत आहे.

📌 प्रतिनिधी – लोकदर्शन न्यूज, उरण