📰 किशोरवयीन मुलींसाठी जेंडर आरोग्य व कायदे विषयक प्रशिक्षण शिबिर संपन्न! ♦️महिला व बालकल्याण विभाग, जिल्हा परिषद पुणे व सावित्रीबाई फुले सामाजिक सेवा प्रतिष्ठान यांचा उपक्रम

लोकदर्शन पुणे👉राहुल खरात

पुणे, दि. ७ :
महिला व बालकल्याण विभाग, जिल्हा परिषद पुणे आणि सावित्रीबाई फुले सामाजिक सेवा प्रतिष्ठान, पुणे यांच्या संयुक्त विद्यमाने किशोरवयीन मुलींसाठी जेंडर आरोग्य व कायदे विषयक प्रशिक्षण कार्यक्रमाचे आयोजन करण्यात आले. हा कार्यक्रम न्यू इंग्लिश स्कूल, अण्णापूर (ता. शिरूर, जि. पुणे) येथे संपन्न झाला.

या शिबिरात मुलींना जेंडर म्हणजे काय, वयात येताना शरीरात होणारे बदल, मासिक पाळीचा अर्थ, त्यावेळी येणारा शारीरिक त्रास व मासिक पाळीचे चक्र यासंदर्भात चित्रांच्या माध्यमातून सहज व सुलभ पद्धतीने माहिती देण्यात आली.

स्वतःचे संरक्षण, वैयक्तिक स्वच्छता, सकस आहाराचे महत्त्व या विषयांवर गोष्टीरूप संवाद साधत मुलींना उपयुक्त माहिती दिली गेली. या प्रशिक्षणादरम्यान प्रशिक्षक वर्षा मॅडम व मनिषा ताई परदेशी यांनी मार्गदर्शन केले.

कार्यक्रमासाठी मुखध्यापक श्री. वाबळे सर व शिक्षिका धनश्री ताटे मॅडम यांचे विशेष सहकार्य लाभले. शिबिरात सहभागी सर्व मुलींना शेंगदाण्याचे लाडू देऊन खाऊचे वाटप करण्यात आले. मुलींनी उत्स्फूर्तपणे सहभाग घेत आपल्या मनातील प्रश्न उपस्थित केले, त्याचे समाधानकारक उत्तरही प्रशिक्षकांनी दिले.

या उपक्रमामुळे मुलींमध्ये आरोग्यविषयी जागरूकता वाढली असून, स्वस्थ आणि सुरक्षित किशोरावस्था घडविण्यासाठी अशा शिबिरांची गरज असल्याचे मत उपस्थितांनी व्यक्त केले.

📌 प्रतिनिधी – लोकदर्शन न्यूज, पुणे जिल्हा