📰 चंद्रपूर जिल्ह्यातील लष्करी अळीग्रस्त शेतकऱ्यांना सरसकट नुकसान भरपाई द्या – आ. सुधीर मुनगंटीवार* ♦️🌾 ना. आशिष जयस्वाल यांच्याकडून मंत्रिमंडळात प्रस्ताव मांडण्याचे आश्वासन* l

लोकदर्शन चंद्रपूर 👉मोहन भारती

चंद्रपूर, दि. ४ जून :
चंद्रपूर जिल्ह्यात यंदाच्या खरीप हंगामात धान आणि कापूस पिकांवर लष्करी अळीचा मोठ्या प्रमाणात प्रादुर्भाव झाल्याने हजारो शेतकऱ्यांचे प्रचंड आर्थिक नुकसान झाले आहे. या पार्श्वभूमीवर राज्याचे माजी वने व सांस्कृतिक कार्यमंत्री तथा आमदार सुधीर मुनगंटीवार यांनी लष्करी अळीमुळे बाधित झालेल्या सर्व शेतकऱ्यांना सरसकट नुकसान भरपाई देण्याची ठाम मागणी कृषी राज्यमंत्री आशिष जयस्वाल यांच्याकडे केली.

या विषयावर ४ जून रोजी मंत्रालयात कृषी राज्यमंत्री आशिष जयस्वाल यांच्या अध्यक्षतेखाली आढावा बैठक पार पडली. बैठकीस आ. सुधीर मुनगंटीवार, संबंधित वरिष्ठ अधिकारी तसेच व्हिडीओ कॉन्फरन्सद्वारे चंद्रपूरचे जिल्हाधिकारी विनय गौडा आणि जिल्हा कृषी अधिकारी शंकर तोटावार यांनी सहभाग घेतला.

या बैठकीत खरीप हंगाम २०२४-२५ मध्ये सुमारे ३७,००० हेक्टर क्षेत्रावर लष्करी अळीचा प्रादुर्भाव झाल्याचे नमूद करण्यात आले. त्यामुळे शेतकऱ्यांचे संपूर्ण पीक आणि उत्पन्न धोक्यात आले आहे. या गंभीर परिस्थितीत राज्य सरकारने तातडीने हस्तक्षेप करावा आणि संपूर्ण जिल्ह्यातील शेतकऱ्यांना योग्य तो नुकसान भरपाईचा लाभ मिळवून द्यावा, अशी आग्रही मागणी आ. मुनगंटीवार यांनी केली.

या मागणीला सकारात्मक प्रतिसाद देत, कृषी राज्यमंत्री आशिष जयस्वाल यांनी लवकरच प्रस्ताव मंत्रिमंडळात मांडण्याचे आश्वासन दिले. “राज्य सरकार शेतकऱ्यांच्या पाठीशी खंबीरपणे उभे आहे. शेतकऱ्यांना न्याय मिळावा, यासाठी आम्ही कटिबद्ध आहोत,” असे प्रतिपादन त्यांनी यावेळी केले.

ही बैठक आणि झालेल्या चर्चेमुळे चंद्रपूर जिल्ह्यातील शेतकऱ्यांच्या आशा पल्लवित झाल्या असून, आता त्यांच्या नुकसानभरपाईसाठी तात्काळ निर्णय होण्याची अपेक्षा व्यक्त केली जात आहे.