लोकदर्शन पुणे 👉मोहन भारती
मंचर, ता. आंबेगाव, जि. पुणे येथील कवयित्री सौ. भारती वसंत वाघमारे यांनी मातृदिनानिमित्त आईच्या निस्वार्थ प्रेम, संघर्ष आणि त्यागावर आधारित “🌹आई नावाचं पान🌹” ही अत्यंत भावनिक आणि हृदयस्पर्शी कविता साकारली आहे.
आई म्हणजे प्रत्येकाच्या आयुष्यातील पहिली गुरु, मायेची सावली आणि संकटात धीर देणारी शक्ती. या कवितेतून कवयित्रींनी ग्रामीण भागातील आईचे कष्टमय जीवन, तिचे अपार प्रेम आणि लेकरांसाठी केलेला संघर्ष अत्यंत प्रभावी शब्दांत मांडला आहे.
कवितेच्या प्रत्येक ओळीत आईची माया, त्याग आणि मुलांसाठी जगण्याची तिची धडपड जिवंतपणे उभी राहते. “हाताचं करून पाळणा आई रात रात जागते” या ओळींतून आईची लेकरांसाठीची जागरणं आणि काळजी व्यक्त होते, तर “दहा रुपयांसाठी काम केलं खाणीवर” या ओळीतून गरिबीशी झुंज देत संसार सांभाळणाऱ्या आईचे वास्तव चित्र उभे राहते.
कवयित्रींनी आईच्या साध्या पण सुंदर व्यक्तिमत्त्वाचे वर्णन करताना “नऊवारी साडी, आई चापून चोपूण नेसायची” अशा शब्दांत तिच्या साधेपणातील सौंदर्य अधोरेखित केले आहे. ग्रामीण संस्कृती, कष्टमय जीवन आणि मायेची ऊब यांचा सुंदर संगम या कवितेत अनुभवायला मिळतो.
आईच्या संघर्षाची कहाणी आठवत कवयित्री शेवटी देवाकडे तिच्या सुखासाठी प्रार्थना करतात. त्यामुळे ही कविता केवळ शब्दांची रचना न राहता प्रत्येकाच्या मनाला भिडणारी भावना बनते. मातृदिनाच्या निमित्ताने आईप्रती कृतज्ञता व्यक्त करणारी ही कविता समाजातील प्रत्येक व्यक्तीला आपल्या आईच्या त्यागाची जाणीव करून देते.
सध्या सोशल मीडियावर आणि साहित्यप्रेमींमध्ये या कवितेचे मोठ्या प्रमाणात कौतुक होत असून अनेकांनी कवयित्रींच्या संवेदनशील लेखणीचे अभिनंदन केले आहे.
कवयित्री परिचय :
सौ. भारती वसंत वाघमारे
मंचर, तालुका आंबेगाव, जिल्हा पुणे
मातृदिनानिमित्त सादर केलेली त्यांची “आई नावाचं पान” ही कविता प्रत्येकाच्या हृदयात आईबद्दलचा आदर आणि प्रेम अधिक दृढ करणारी ठरत आहे.
