📰 नानक पठार येथे लागलेल्या आगीवर वेळीच नियंत्रण; काहींचे नुकसान, मोठी दुर्घटना टळली

लोकदर्शन 👉मोहन भारती

गडचांदूर (ता. जिवती ) – नानक पठार येथे काल अचानक आग लागल्याची घटना घडली. या घटनेची माहिती मिळताच भाजपा महामंत्री (कोरपना तालुका) सतीश उपलेंचवार यांनी तात्काळ माणिकगड सिमेंट कंपनीशी संपर्क साधून अग्निशामक गाडीची मागणी केली.

माणिकगड सिमेंटचे युनिट हेड श्री अतुल कन्सल तसेच कंपनीचे श्री नवीन कौशिक यांनी परिस्थितीचे गांभीर्य ओळखून त्वरित अग्निशामक गाडी उपलब्ध करून दिली. त्यामुळे आग वेळेत आटोक्यात आणणे शक्य झाले आणि मोठी दुर्घटना टळली.

मात्र या आगीत अनंता भाऊ बावणे, शेषराव बावळे आणि विष्णू मरेवाड यांच्या कडबा व कुटार जळून मोठे नुकसान झाले आहे. या घटनेत त्यांचे लाखो रुपयांचे नुकसान झाल्याची माहिती मिळत आहे.

या घटनेची माहिती श्री महेश देवकाते (जिल्हाध्यक्ष, भारतीय जनता पार्टी युवा मोर्चा) तसेच श्री राजेश राठोड यांनी दिली होती. त्यांच्या सतर्कतेमुळे प्रशासन व स्थानिक प्रतिनिधींना त्वरित हालचाल करता आली.

गावातील नागरिकांनीही वेळेवर मदत करून आग विझविण्यास सहकार्य केले. विशेषतः माणिकगड सिमेंट कंपनीने तात्काळ फायर ब्रिगेड उपलब्ध करून दिल्यामुळे मोठी हानी टळली.

या सर्वांच्या सहकार्याबद्दल सतीश उपलेंचवार (भाजपा महामंत्री, कोरपना तालुका) यांनी माणिकगड सिमेंट कंपनी तसेच मदत करणाऱ्या सर्व नागरिकांचे मनःपूर्वक आभार व्यक्त केले आहेत.