🌿 चंद्रपूर प्रदूषणावर सरकारचे ठोस पाऊल – पर्यावरण मंत्री पंकजा मुंडे यांचा पाहणी दौरा

लोकदर्शन चंद्रपूर 👉मोहन भारती

चंद्रपूर जिल्ह्यातील वाढत्या प्रदूषण समस्यांवर अखेर निर्णायक हालचाली सुरू झाल्या असून, पर्यावरण व वातावरणीय बदल मंत्री पंकजा मुंडे या १६ एप्रिल २०२६ रोजी जिल्ह्याच्या महत्त्वपूर्ण पाहणी दौऱ्यावर येत आहेत.

या दौऱ्यामागे आमदार सुधीर मुनगंटीवार यांच्या सातत्यपूर्ण आणि प्रभावी पाठपुराव्याची महत्त्वाची भूमिका असल्याचे स्पष्ट झाले आहे. त्यांनी विधानसभेत वेळोवेळी चंद्रपूरमधील औद्योगिक प्रदूषण, कोळसा खाणींचा परिणाम, तसेच नद्यांच्या दूषित अवस्थेबाबत मुद्देसूद मांडणी करत शासनाचे लक्ष वेधले होते.

चंद्रपूर महाऔष्णिक विद्युत केंद्र, वेकोलीच्या कोळसा खाणी, तसेच कोल वॉशरीजमुळे निर्माण होणाऱ्या प्रदूषणाचा स्थानिक नागरिकांच्या आरोग्यावर गंभीर परिणाम होत असल्याची बाब त्यांनी अधोरेखित केली होती. याशिवाय झरपट व इरई नद्यांच्या प्रदूषणाचा प्रश्नही त्यांनी सातत्याने मांडला.

या पार्श्वभूमीवर मंत्री पंकजा मुंडे या दुर्गापूर येथील विद्युत केंद्र, बेलसणी येथील कोल वॉशरीज आणि गडचांदूर येथील सिमेंट प्रकल्पाला भेट देऊन प्रत्यक्ष परिस्थितीचा आढावा घेणार आहेत. तसेच भिवापूर परिसरातील नदी प्रदूषणाची पाहणी करून संबंधित अधिकाऱ्यांना आवश्यक त्या सूचना देण्यात येणार आहेत.

नियोजन भवन, चंद्रपूर येथे जिल्ह्यातील प्रदूषण प्रश्नांवर आणि पशुपालकांच्या अडचणींवर सविस्तर बैठक होणार असून, यामध्ये ठोस उपाययोजनांवर भर दिला जाणार आहे.

या दौऱ्यामुळे चंद्रपूर जिल्ह्यातील प्रदूषण समस्यांवर प्रभावी आणि दीर्घकालीन उपाययोजना निश्चित होतील, अशी अपेक्षा व्यक्त केली जात आहे.