🔸 महात्मा फुले जनआरोग्य योजनेत यकृत प्रत्यारोपणाचा समावेश; आमदार देवराव भोंगळे यांच्या पाठपुराव्याला यश

लोकदर्शन 👉 मोहन भारती

राजुरा, दि. १० : राजुरा विधानसभा क्षेत्राचे आमदार देवराव भोंगळे यांच्या सातत्यपूर्ण पाठपुराव्यामुळे महात्मा ज्योतिराव फुले जन आरोग्य योजनेत आता यकृत प्रत्यारोपण (Liver Transplant) या महागड्या शस्त्रक्रियेचा समावेश करण्यात आला आहे. या निर्णयामुळे गरजू आणि आर्थिकदृष्ट्या दुर्बल रुग्णांना मोठा दिलासा मिळणार आहे.

आमदार भोंगळे यांनी २२ जानेवारी २०२६ रोजी राज्याचे मुख्यमंत्री देवेंद्र फडणवीस यांच्याकडे पत्राद्वारे यासंदर्भात विशेष मागणी केली होती. त्यांच्या या मागणीची दखल घेत शासनाने हा महत्त्वपूर्ण निर्णय घेतला आहे. आता यकृत प्रत्यारोपणासाठी तब्बल २२ लाख रुपयांपर्यंतचा खर्च या योजनेअंतर्गत मोफत उपलब्ध होणार आहे.

यापूर्वी अवयव प्रत्यारोपणासारख्या अत्यंत खर्चिक शस्त्रक्रिया सर्वसामान्यांच्या आवाक्याबाहेर असल्याने अनेक रुग्णांना उपचारांपासून वंचित राहावे लागत होते. ही बाब लक्षात घेऊन आमदार भोंगळे यांनी शासन दरबारी सातत्याने पाठपुरावा केला होता. त्यांच्या प्रयत्नांना यश मिळाल्याने आता शासनाने अंगीकृत शासकीय रुग्णालयांच्या राखीव निधीतून या शस्त्रक्रियांचा खर्च उचलण्यास मान्यता दिली आहे.

या निर्णयानुसार यकृत प्रत्यारोपणासह हृदय प्रत्यारोपण (१५ लाख), फुफ्फुस प्रत्यारोपण (२० लाख) आणि बोन मॅरो ट्रान्सप्लांटसह एकूण १० प्रकारच्या अत्यंत क्लिष्ट शस्त्रक्रियांचा लाभ राज्यातील गोरगरीब जनतेला मिळणार आहे.

या ऐतिहासिक निर्णयामुळे राजुरा मतदारसंघासह संपूर्ण राज्यातील हजारो कुटुंबांना मोठा दिलासा मिळाला आहे. “पैशाअभावी कोणाचाही उपचार थांबू नये, हे आमचे ध्येय आहे. मा. मुख्यमंत्री देवेंद्र फडणवीस यांनी आमच्या मागणीला मान देत हा लोकहिताचा निर्णय घेतल्याबद्दल मी त्यांचा आभारी आहे,” अशा भावना आमदार देवराव भोंगळे यांनी व्यक्त केल्या.

या निर्णयामुळे आरोग्य क्षेत्रात मोठे सकारात्मक परिवर्तन घडणार असून आमदार देवराव भोंगळे यांच्या कार्यतत्परतेचे सर्व स्तरातून कौतुक होत आहे.