*📰 थंडीचा वाढता कहर; निमसाखर परिसरात उबदार कपड्यांची चलती*

*लोकदर्शन निमसाखर 👉(ता. इंदापूर, वार्ताहर गणेशराव धनवडे) :*

निमसाखर परिसरात गेल्या काही दिवसांपासून थंडीचा जोर वाढला असून नागरिकांनी उबदार कपडे, स्वेटर, मफलर आणि ब्लँकेट्सचा वापर वाढवला आहे. पहाटे व रात्रीच्या वेळी गार वारे वाहत असल्याने वातावरणात गारवा पसरला आहे.

हवामान खात्याच्या माहितीनुसार, पुढील दोन दिवस तापमानात आणखी घट होण्याची शक्यता आहे. सकाळच्या वेळी दवबिंदू पडत असून शेतकरी वर्गाला सकाळच्या थंडीत शेतात काम करताना त्रास होत आहे. त्याचप्रमाणे शाळकरी मुलेही थंडीमुळे थरथरताना दिसत आहेत.

थंडीच्या वाढत्या लाटेमुळे परिसरातील चहाचे टपरी, गरम पदार्थांची हॉटेल्स आणि सूप सेंटर येथे नागरिकांची गर्दी वाढली आहे. उबदार पेये आणि गरम पदार्थांना प्रचंड मागणी वाढली आहे.

दरम्यान, आरोग्य तज्ज्ञांनी नागरिकांना सर्दी, खोकला आणि ताप यांसारख्या आजारांपासून बचावासाठी आवश्यक ती काळजी घेण्याचे आवाहन केले आहे. विशेषतः लहान मुले, वृद्ध आणि आजारी व्यक्तींनी थंडीपासून बचावासाठी उबदार कपड्यांचा वापर करावा, असे आवाहन करण्यात आले आहे.

✍️ वार्ताहर : गणेशराव धनवडे, निमसाखर (ता. इंदापूर)
स्त्रोत : लोकप्रश्न न्यूज पोर्टल