🌟 चंद्रपूरकरांना नववर्षात आरोग्यसेवेची भव्य भेट! ♦️आ. सुधीर मुनगंटीवार यांच्या प्रयत्नातून 616.46 कोटींचे शासकीय वैद्यकीय महाविद्यालय जानेवारीत खुले होणार 🔸केंद्रीय गृहमंत्री अमितजी शहा यांना लोकार्पणासाठी विशेष निमंत्रण

लोकदर्शन चंद्रपूर :👉मोहन भारती

चंद्रपूर जिल्ह्याला आरोग्य आणि शिक्षणाच्या क्षेत्रात नवा अध्याय लाभणार आहे. आ. सुधीर मुनगंटीवार यांच्या सातत्यपूर्ण प्रयत्नांतून साकारलेले 616.46 कोटी रुपयांचे शासकीय वैद्यकीय महाविद्यालय आणि 500 खाटांचे अत्याधुनिक रुग्णालय याचे लोकार्पण जानेवारी 2026 मध्ये भव्य सोहळ्यात होणार आहे.

या लोकार्पण समारंभासाठी भारताचे गृहमंत्री अमितजी शहा यांना आ. मुनगंटीवार यांनी आमंत्रित केले असून त्यांनी त्याला सकारात्मक प्रतिसाद दिला आहे. लवकरच कार्यक्रमाची तारीख जाहीर होणार आहे.

या प्रकल्पाचे बांधकाम कार्य पूर्णत्वास आले असून, एच.एस.सी.सी. (इंडिया) लिमिटेड मार्फत मेसर्स शापूरजी पालनजी कंपनी लिमिटेड यांनी उच्च दर्जात हे काम पूर्ण केले आहे. अर्थमंत्री म्हणून कार्यरत असताना आ. मुनगंटीवार यांनी या प्रकल्पाला गती देत निधी वितरण, नियमित आढावा बैठक आणि दर्जावर विशेष लक्ष केंद्रित केले.

या योजनेसाठी सन 2018-19 ते 2024-25 दरम्यान एकूण ₹616.46 कोटी निधी मंजूर करण्यात आला आहे. 100 एमबीबीएस विद्यार्थ्यांसाठी शिक्षणाची सुविधा आणि विदर्भातील नागरिकांसाठी उच्च प्रतीची आरोग्यसेवा या प्रकल्पातून उपलब्ध होणार आहे.

या प्रसंगी बोलताना आ. मुनगंटीवार म्हणाले,

> “वैद्यकीय शिक्षण, संशोधन आणि उपचार यांच्या दृष्टीने हे संस्थान महाराष्ट्राच्या आरोग्य क्षेत्रात एक नवे पर्व ठरेल. चंद्रपूर जिल्ह्याचा विकास हा केवळ आकडेवारीत नव्हे, तर लोकांच्या जीवनगुणवत्तेत दिसला पाहिजे — हे आमचे ध्येय आहे.”

चंद्रपूर जिल्ह्यात आरोग्य क्षेत्रावर भर देत त्यांनी अनेक उपक्रम राबवले आहेत. शासकीय वैद्यकीय महाविद्यालयानंतर आता कॅन्सर रुग्णालयासारखा महत्वाचा प्रकल्पही आकार घेत आहे. त्यांच्या पालकमंत्री कार्यकाळात 14 प्राथमिक आरोग्य केंद्रांच्या इमारती, ग्रामीण रुग्णालये, उपजिल्हा रुग्णालयांचे श्रेणीवर्धन आणि स्मार्ट प्रा.आ.केंद्रांची उभारणी झाली आहे.

आरोग्याबरोबरच शिक्षण क्षेत्रातही आ. मुनगंटीवार यांचे योगदान लक्षणीय आहे —
चंद्रपूर जिल्ह्यातील सैनिकी शाळा, एस.एन.डी.टी. महिला विद्यापीठाचे उपकेंद्र, स्व. सुषमा स्वराज महिला सक्षमीकरण केंद्र, शासकीय कृषी व अभियांत्रिकी महाविद्यालये, तसेच गोंडवाना विद्यापीठाचे उपकेंद्र अशा अनेक प्रकल्पांमुळे जिल्हा शैक्षणिक नकाशावर ठळकपणे झळकत आहे.

शासनाने नुकतीच मुल येथे शासकीय तंत्रनिकेतन सुरू करण्यास मान्यता दिली असून, हे सर्व उपक्रम जिल्ह्याच्या सर्वांगीण विकासाला गती देणारे ठरले आहेत.

—