📰 बाबीर विद्यालयात माजी विद्यार्थ्यांचा स्नेह मेळावा उत्साहात संपन्न सोळा वर्षांनंतर २००८ च्या बॅचचे माजी विद्यार्थी पुन्हा एकत्र आले; जुन्या आठवणींना दिला उजाळा

इंदापूर (ता. २८, प्रतिनिधी धनवडे गणेश, निमसाखर –)
:
इंदापूर तालुक्यातील श्री बाबीर विद्यालय, रुई येथे दि. २६ ऑक्टोबर रोजी माजी विद्यार्थ्यांचा स्नेह मेळावा उत्साहात पार पडला. तब्बल सोळा वर्षांनंतर सन २००८ ची बॅच पुन्हा एकत्र आली आणि शाळेच्या प्रांगणात आनंद, आपुलकी आणि आठवणींचा जल्लोष रंगला.

या मेळाव्याच्या अध्यक्षस्थानी विद्यालयाचे अध्यक्ष अमरसिंह पाटील होते. कार्यक्रमाचे आयोजन विद्यालयाचे मुख्याध्यापक जगन्नाथ पाटील यांच्या मार्गदर्शनाखाली करण्यात आले. यावेळी पर्यवेक्षक धनाजी गावडे, शिक्षक दादासाहेब निटवे, उस्मान मुलाणी, सुनील दराडे, अमीन मुल्ला, आप्पासाहेब डोंबाळे, तसेच सेवानिवृत्त शिक्षक गौतम सोनवणे, महादेव करे, शिक्षिका मीराताई पाटील, कर्मचारी संजय भगत आणि माजी विद्यार्थी मोठ्या संख्येने उपस्थित होते.

कार्यक्रमाची सुरुवात सरस्वती पूजन व शाळेचे संस्थापक स्व. आत्माराम (भाऊ) पाटील यांच्या प्रतिमेला पुष्पांजली वाहून करण्यात आली. त्यानंतर उपस्थित मान्यवर व शिक्षकांचा वृक्ष भेट देऊन सन्मान करण्यात आला. विद्यार्थ्यांनीही आपल्या गुरुजनांचा सन्मान करून त्यांच्याप्रती कृतज्ञता व्यक्त केली.

मेळाव्यात माजी विद्यार्थ्यांनी आपल्या जीवनातील संस्मरणीय क्षणांची उजळणी केली. “शाळेतील खेळ, गमती-जमती, शिस्त आणि शिक्षेचे गोड क्षण” या आठवणींनी सर्वांचे डोळे ओले झाले आणि वातावरण भावनिक झाले.

शिक्षकांनी विद्यार्थ्यांना मार्गदर्शन करताना सांगितले की — “गुरूंना आणि शाळेला विसरू नका. प्रगतीच्या मार्गावर चालत राहा आणि समाजात चांगले उदाहरण घालून द्या.”

कार्यक्रमाचे सूत्रसंचालन तानाजी मारकड यांनी केले, तर आभार विष्णू मारकड यांनी मानले.

विशेष आकर्षण म्हणून “माजी विद्यार्थ्यांचा वर्ग”ही भरवण्यात आला, ज्यामध्ये शिक्षक गौतम सोनवणे, दादासाहेब निटवे आणि सुनील दराडे यांनी माजी विद्यार्थ्यांना जुन्या आठवणींनी भारावून टाकले. विद्यार्थ्यांनी कविता सादर केली, बाराखडी म्हणून दाखवली तसेच मुला-मुलींनी खो-खो खेळून बालपणाचा आनंद घेतला.

शेवटी सर्वांनी एकत्र स्नेहभोजनाचा आस्वाद घेत, “मैत्री आणि आठवणींच्या सोनेरी पानांची” पुनर्भेट साजरी केली.
सोळा वर्षांनंतर भरलेल्या या स्नेह मेळाव्याने बाबीर विद्यालयातील दिवस पुन्हा उजळून निघाले.

======================
📸 – प्रतिनिधी धनवडे गणेश (अपंग), निमसाखर, ता. इंदापूर, जि. पुणे
लोकदर्शन सकारात्मक लोकजागर