🌍 गडचांदुरचा अभिमान! निलेश ताजने यांना ‘महाराष्ट्र रत्न’ पुरस्कार ♦️लोकमत पुरस्कृत ग्लोबल इकॉनॉमिक कन्व्हेन्शन मध्ये लंडन येथे होणार गौरव

लोकदर्शन 👉शिवाजी सेलोकर

गडचांदुर (प्रतिनिधी): गडचांदुरचे भूमिपुत्र व प्रेरणादायी युवा उद्योजक निलेश ताजने यांना प्रतिष्ठित “महाराष्ट्र रत्न” पुरस्कार जाहीर झाला आहे. लंडन येथे होणाऱ्या ग्लोबल इकॉनॉमिक कन्व्हेन्शन या आंतरराष्ट्रीय परिषदेत त्यांना हा सन्मान प्रदान करण्यात येणार आहे.

श्रीतेज प्रतिष्ठानचे अध्यक्ष असलेले ताजने यांनी स्वप्नपूर्ती फूड्स लिमिटेड च्या माध्यमातून गेल्या सहा वर्षांत हजारो तरुणांना रोजगार उपलब्ध करून दिला आहे. समाजसेवेच्या ध्येयाने प्रेरित होऊन ते शासनाच्या विविध कल्याणकारी योजना सर्वसामान्यांपर्यंत निःशुल्क पोहोचविण्याचे कार्य अविरतपणे करीत आहेत.

या दिमाखदार सोहळ्यास मुख्यमंत्री देवेंद्र फडणवीस, केंद्रीय वाणिज्य व उद्योग मंत्री पियूष गोयल, तसेच केंद्रीय रस्ते वाहतूक व महामार्ग मंत्री नितीन गडकरी उपस्थित राहणार आहेत.

ग्लोबल इकॉनॉमिक कन्व्हेन्शन मध्ये भारताची ५ ट्रिलियन डॉलर अर्थव्यवस्था, जागतिक व्यापारातील बदल, तंत्रज्ञान, पायाभूत सुविधा, हरित ऊर्जा यांसारख्या महत्त्वपूर्ण विषयांवर चर्चा होणार आहे.

या आंतरराष्ट्रीय सन्मानामुळे निलेश ताजने यांचा गौरव हा गडचांदुर व विदर्भासाठी अभिमानाचा क्षण ठरणार आहे.