लोकदर्शन 👉मोहन भारती
गडचांदूर (ता. कोरपना) –
कोरपना तालुका काँग्रेस व गडचांदूर शहर काँग्रेस कमिटीच्या वतीने बालाजी सेलिब्रेशन हॉल येथे आयोजित भव्य कार्यकर्ता मेळाव्यात काँग्रेसच्या झेंड्याखाली उत्साह आणि जोश ओसंडून वाहत होता.
या मेळाव्यात खासदार प्रतिभाताई धानोरकर व जिल्हाध्यक्ष माजी आमदार सुभाषभाऊ धोटे यांच्या प्रमुख उपस्थितीत कामगार नेते सुरज ठाकरे यांचे समर्थक नारंडाचे आशिष कुचनकर, गडचांदूरचे मिलींद सोनटक्के, जिवतीचे गणेश सुरनर, सोनुर्लीचे शंकर वाढई, आशिष बावणे या प्रमुखांसह जवळपास २०० कार्यकर्त्यांनी काँग्रेसमध्ये प्रवेश करून काँग्रेस विचारसरणीवरील आपला विश्वास दृढ केला.
मेळाव्यात मतांची चोरी विरोधातील सह्यांची मोहीम राबविण्यात आली असून तिला प्रचंड आणि उत्स्फूर्त प्रतिसाद मिळाला. बैठकीदरम्यान भाजपच्या कारस्थानांवर गंभीर भाष्य करण्यात आले. खासदार राहुल गांधींनी उघड केलेल्या भाजपच्या मतचोरी प्रकरणाबाबत तसेच बिहारमधील सुमारे ३५ लाख मतदारांची नावे वगळल्याच्या प्रकारावर चर्चा झाली. स्थानिक कार्यकर्त्यांना मतदार यादीतील गैरप्रकारांवर बारकाईने लक्ष ठेवण्याचे आणि एकजुटीने लढण्याचे आवाहन यावेळी करण्यात आले.
या ऐतिहासिक मेळाव्याला प्रतिभा धानोरकर, सुभाष धोटे, अरुण धोटे, उत्तमराव पेचे, शंतनू धोटे, सविता टेकाम, संतोष महाडोळे, नोगराज मंगरूळकर, विठ्ठलराव थिपे, संभाजी कोवे, रऊफ खान, अशोकराव बावणे यांच्यासह शेकडो पदाधिकारी व कार्यकर्ते उपस्थित होते.
मोठ्या संख्येने जमलेल्या कार्यकर्त्यांनी मेळाव्याला ऐतिहासिक आणि ऊर्जावान वळण दिले.
