🟣 “आधुनिक अध्यापनासाठी तंत्रज्ञान आत्मसात करणे काळाची गरज” – प्रा. प्रफुल्ल माहुरे यांचे मार्गदर्शन ♦️शिक्षक प्रशिक्षण शिबिरात तंत्रस्नेही व प्रेरणादायी शिक्षक होण्याचे आवाहन

लोकदर्शन👉मोहन भारती

गडचांदूर –
“सध्याच्या वेगाने बदलणाऱ्या शैक्षणिक प्रणालीत शिक्षकांनी तंत्रज्ञानाशी सुसंगत राहणे अत्यंत आवश्यक आहे. अध्यापन प्रभावी व परिणामकारक करण्यासाठी ध्वनीचित्र माध्यमे, संगणकाधारित साधने, दृक-श्राव्य साधने, तसेच कृत्रिम बुद्धिमत्ता आधारित शैक्षणिक साहित्य यांचा योग्य वापर व्हायला हवा,” असे प्रतिपादन महात्मा गांधी कनिष्ठ महाविद्यालय, गडचांदूरचे उपप्राचार्य प्रा. प्रफुल्ल माहुरे यांनी केले.

एकलव्य इंग्लिश स्कूल व ज्युनियर कॉलेज, बिबी यांच्या वतीने आयोजित शिक्षक प्रशिक्षण शिबिरात प्रा. माहुरे प्रमुख प्रशिक्षक म्हणून बोलत होते. केवळ विषयाचे ज्ञान देणारे शिक्षक न होता, विद्यार्थ्यांचे मार्गदर्शक, प्रेरणास्रोत व समुपदेशक बनण्याचा सल्ला त्यांनी उपस्थित शिक्षकांना दिला.

ते पुढे म्हणाले की, “शिक्षकांनी विद्यार्थ्यांच्या बौद्धिक पातळीची अचूक ओळख ठेवून अध्यापनात योग्य तंत्र वापरणे गरजेचे आहे. दृकश्राव्य साधनांचा वापर, नवोदय विचारसरणी, नवे शैक्षणिक धोरण व मूल्याधिष्ठित शिक्षण यांची सांगड घालणे ही काळाची गरज आहे.”

कार्यक्रमाच्या अध्यक्षस्थानी संस्थेचे सचिव प्रा. आशिष देरकर होते. प्रास्ताविक प्राचार्य नितेश शेंडे यांनी केले. कार्यक्रमाचे सुत्रसंचालन पूजा बर्मन यांनी केले तर आभार प्रदर्शन विठ्ठल टोंगे यांनी मानले.

या प्रशिक्षण शिबिरात शाळेतील सर्व शिक्षकांनी उत्स्फूर्त सहभाग नोंदवला. उपक्रम, चर्चासत्रे, उदाहरणे व प्रश्नोत्तरांद्वारे शिबिर माहितीपूर्ण आणि रंजनात्मक ठरले. या अनुभवातून शिक्षकांना अध्यापनात नवदृष्टीकोन व नव्या कौशल्यांची प्रेरणा मिळाल्याची भावना अनेकांनी व्यक्त केली.