📰 बिबी ग्रामपंचायतीची स्वच्छतेतील उत्कृष्ट कामगिरी; तालुका स्तरावर कौतुकास्पद ठरली

लोकदर्शन👉मोहनभारती

गडचांदूर ÷
हागणदारी मुक्त अधिक उत्कृष्ट ग्रामपंचायत उपक्रमांतर्गत आयोजित अंतर तालुका तपासणी दरम्यान बिबी ग्रामपंचायतीची स्वच्छता आणि कचरा व्यवस्थापन क्षेत्रातील कामगिरी विशेषतः उल्लेखनीय ठरली. पंचायत समिती बल्लारपूर आणि कोरपना येथील अधिकाऱ्यांच्या संयुक्त पथकाने प्रत्यक्ष ग्रामपंचायतीला भेट देऊन विविध उपक्रमांची तपासणी केली.

तपासणी पथकात गटविकास अधिकारी धनंजय साळवे, विस्तार अधिकारी दिलीप बैलनवार, गट समन्वयक सुनील नुतलवार (बल्लारपूर), विजय पेंदाम, पंढरीनाथ गेडाम, दादाराव पवार, लॉरेन्स खोब्रागडे, तसेच सांडपाणी व घनकचरा सल्लागार विठ्ठल अहिरकर यांचा समावेश होता.

या पाहणीत शोष खड्डे, नाडेप कंपोस्ट युनिट्स, खत खड्डे, कचराकुंड्या, सार्वजनिक स्वच्छता संकुल, ओला-सुका कचरा वर्गीकरण व अपशिष्ट व्यवस्थापन यांची सखोल पाहणी करण्यात आली. ग्रामपंचायतीकडून ही कामे नियोजनबद्ध, दर्जेदार आणि प्रभावी पद्धतीने केल्याचे निरीक्षण पथकाने नोंदवले.

विशेषतः ग्रामस्थांचा सक्रिय सहभाग, महिलांचा योगदान, तसेच युवकांमध्ये स्वच्छतेबाबतची जनजागृती ही बाब सर्वाधिक लक्षवेधी ठरली. अधिकाऱ्यांनी नियमित देखरेख आणि जनजागृती उपक्रम वाढवण्याच्या सूचना दिल्या.

पाहणीवेळी सरपंच माधुरी टेकाम, उपसरपंच आशिष देरकर, ग्रामसेवक धनराज डुकरे, सुनील कुरसंगे व ग्रामस्थ उपस्थित होते.
या तपासणीतून बिबी ग्रामपंचायत ही इतर गावांसाठी प्रेरणादायी मॉडेल ठरत असल्याचे स्पष्टपणे अधोरेखित झाले.