📰 शेतकऱ्याला कृषी उत्पन्न बाजार समितीकडून २० हजारांची मदत ♦️वीज पडून बैलजोडीचा झाला होता मृत्यू

लोकदर्शन 👉मोहन भारती

बाखर्डी, कोरपना तालुका – वडगाव येथील शेतकरी नागोबा मारोती देवाळकर यांच्यावर आकाशातून कोसळलेल्या विजेने दुहेरी संकट ओढावले. या दुर्घटनेत त्यांच्या दोन बैलांचा मृत्यू झाला. या दु:खद प्रसंगानंतर कृषी उत्पन्न बाजार समिती, कोरपना यांच्या वतीने २० हजार रुपयांची तत्काळ आर्थिक मदत करण्यात आली.

ही मदत बाजार समितीचे सभापती अशोक बावणे यांच्या हस्ते धनादेशाच्या स्वरूपात नागोबा देवाळकर यांना सुपूर्त करण्यात आली. नैसर्गिक आपत्तीमुळे नुकसान झालेल्या शेतकऱ्यांच्या मदतीस तत्पर राहण्याचा आमचा प्रयत्न असल्याचे यावेळी सभापती अशोक बावणे यांनी सांगितले.

यावेळी कवडू देरकर, सचिव प्रकाश गोरे, पर्यवेक्षक तसेच कृषी उत्पन्न बाजार समितीचे सर्व संचालक मंडळ उपस्थित होते.

शेतकऱ्याच्या संकटावर फुंकर घालणारा हा निर्णय कौतुकास्पद ठरत असून, प्रशासन आणि संस्थांनी अशा प्रकारे शेतकऱ्यांच्या पाठीशी उभे राहावे, अशी अपेक्षा व्यक्त केली जात आहे.