📰 रस्त्याच्या मागणीसाठी पालगाववासीय पुन्हा आक्रमक – आमदार देवराव भोंगळे यांच्या नेतृत्वात अल्ट्राटेक कंपनीविरोधात ठिय्या आंदोलन

लोकदर्शन 👉–मोहन भारती

मागील अनेक वर्षांपासून रस्त्याच्या समस्येने त्रस्त असलेल्या पालगाव ग्रामस्थांनी पुन्हा एकदा आक्रमक पवित्रा घेत अल्ट्राटेक सिमेंट कंपनीच्या नांदा (आवाळपूर) येथील प्रवेशद्वारासमोर आमदार देवराव भोंगळे यांच्या नेतृत्वात ठिय्या आंदोलन सुरू केले आहे.

पालगाव हे अल्ट्राटेक सिमेंट कंपनीचे दत्तक गाव असूनही, आजही गावाला सुलभ रस्ता उपलब्ध नाही. ग्रामस्थांनी गेल्या अडीच ते तीन वर्षांत कंपनीकडे वेळोवेळी निवेदने दिली, चर्चा घेतल्या आणि आंदोलने केली. मात्र कंपनी प्रशासनाने वेळ मारून नेल्याने आणि ग्रामस्थांचा वारंवार अपमान केल्यामुळे ५ मे रोजी प्रथम आंदोलन करण्यात आले होते.

त्या आंदोलनानंतर तीन दिवसांनी अल्ट्राटेक कंपनीने ३० मे रोजी पालगाव ते खान रस्ता तयार करण्याचे लेखी आश्वासन दिले. परंतु जून महिना संपत आला तरी प्रत्यक्ष काम सुरू न झाल्याने ग्रामस्थांचा संयम सुटला आणि त्यांनी पुन्हा एकदा आंदोलनाचा मार्ग अवलंबला.

आंदोलनस्थळी बोलताना आमदार देवराव भोंगळे म्हणाले,
“अल्ट्राटेक मॅनेजमेंटने पालगाव ते माईन्स रस्त्याच्या बांधकामाचे लेखी आश्वासन दिले होते. मुंबईला प्रस्ताव पाठवला गेला, मात्र अजून कोणतीही कारवाई झालेली नाही. ही महाराष्ट्रात दुर्दैवाची आणि लाजीरवाणी बाब आहे की, एका लोकप्रतिनिधीला दुसऱ्यांदा त्याच मुद्द्यावर आंदोलन करावं लागतंय.”

🔹 प्रमुख मुद्दे:

अल्ट्राटेकच्या दत्तक गावात रस्ता नसणे ही विडंबनात्मक बाब

कंपनीकडून दिलेल्या लेखी आश्वासनाची अंमलबजावणी नाही

ग्रामस्थांच्या व स्थानिक कामगारांच्या समस्यांकडे दुर्लक्ष

राजकीय प्रतिनिधीच्या उपस्थितीतही कंपनीचा अरेरावी पवित्रा

ग्रामस्थांनी स्पष्ट केले आहे की, जोपर्यंत प्रत्यक्ष काम सुरू होत नाही, तोपर्यंत आंदोलन मागे घेतले जाणार नाही. यावेळी गावातील महिला, ज्येष्ठ नागरिक, सरपंच अरुण रागीट, व विविध सामाजिक कार्यकर्ते मोठ्या संख्येने आंदोलनात सहभागी झाले होते.