🔴 गोंडवाना विद्यापीठ क्षेत्रात मुक्त विद्यापीठांवर आळा घाला! ♦️गोंडवाना यंग टीचर्स असोसिएशनची विद्यापीठ प्रशासनाकडे ठोस उपाययोजनांची मागणी

📍 लोकदर्शन न्यूज पोर्टल
✍️ शंकर तडस, मोहन भारती

राजुरा – गोंडवाना विद्यापीठाच्या परिक्षेत्रात विविध मुक्त विद्यापीठे व दूरस्थ शिक्षण संस्थांची अभ्यासकेंद्रे वाढल्यामुळे विद्यापीठाशी संलग्नित महाविद्यालयांवर गंभीर परिणाम होत आहे. मागील वर्षात सुमारे २०,००० विद्यार्थ्यांची घट झाल्यामुळे अनेक महाविद्यालयांतील शिक्षक अतिरिक्त झाले असून काही ठिकाणी शैक्षणिक तुकड्याही बंद होण्याच्या मार्गावर आहेत.

या पार्श्वभूमीवर गोंडवाना यंग टीचर्स असोसिएशनने विद्यापीठ प्रशासनाकडे तातडीने हस्तक्षेप करून कारवाई करण्याची मागणी केली आहे. संघटनेचे अध्यक्ष डॉ. संजय गोरे, सचिव डॉ. विवेक गोर्लावार आणि व्यवस्थापन परिषदेचे सदस्य प्राचार्य लेमराज लडके यांनी कुलगुरु डॉ. प्रशांत बोकारे यांच्याकडे सविस्तर निवेदन सादर करत पुढील महत्त्वपूर्ण सूचना दिल्या:

🔹 दूरस्थ शिक्षण संस्थांमुळे स्थानिक विद्यार्थ्यांचा कल नियमित शिक्षणापासून दूर जातो आहे.

🔹 मुक्त विद्यापीठांचे नियम केवळ नोकरी करणाऱ्यांसाठी असताना देखील, अनेक ठिकाणी नियमित विद्यार्थ्यांना प्रवेश दिला जात आहे, हे स्पष्ट उल्लंघन आहे.

🔹 अभ्यासकेंद्रांकडून “नियमित विद्यार्थ्यांना प्रवेश दिला जाणार नाही” असे प्रतिज्ञापत्र घेण्याची सक्ती करावी.

🔹 गोंडवाना विद्यापीठ संलग्नित ज्या महाविद्यालयांमध्ये मुक्त विद्यापीठांचे केंद्र सुरू आहे, त्या केंद्रांना त्वरित बंद करण्याचे निर्देश द्यावेत. अन्यथा त्या महाविद्यालयाचे संलग्नीकरण रद्द करावे.

🔹 कोणत्याही इतर विद्यापीठाच्या अभ्यासक्रमांना सुरू करण्यासाठी गोंडवाना विद्यापीठाची पूर्वपरवानगी घेणे बंधनकारक करावे.

🔹 विद्यापीठाच्या व्यवस्थापन परिषद, सिनेट आणि विद्यापरिषदेत ठराव मांडून राज्यपालांना अहवाल सादर करावा आणि पुढील कारवाई करावी.

गोंडवाना यंग टीचर्स असोसिएशनने व्यक्त केलेली ही भूमिका उच्च शिक्षण क्षेत्रातील समतोल राखण्यासाठी अत्यंत महत्त्वपूर्ण मानली जात असून, यावर तातडीने निर्णय घेण्याची गरज आहे, अशी भावना महाविद्यालयीन वर्तुळातून व्यक्त होत आहे.

—

📌 अधिक माहितीसाठी व अपडेटसाठी वाचा – लोकदर्शन न्यूज पोर्टल
✍️ शंकर तडस | मोहन भारती