🟩 कृषी पंपासाठी विशेष बाब म्हणून विज जोडणी द्या – आमदार सुधीर मुनगंटीवार यांची मुख्यमंत्री देवेंद्र फडणवीस यांच्याकडे मागणी

लोकदर्शन चंद्रपूर👉मोहन भारती

🟩 चंद्रपूर, दि. ७ जून – चंद्रपूर जिल्ह्यातील शेतकऱ्यांच्या सिंचनाच्या वाढत्या समस्येच्या पार्श्वभूमीवर शेतकऱ्यांना कृषी पंपासाठी विशेष बाब म्हणून विद्युत जोडणी द्यावी, अशी मागणी राज्याचे माजी मंत्री तथा आमदार श्री. सुधीर मुनगंटीवार यांनी मुख्यमंत्री श्री. देवेंद्र फडणवीस यांच्याकडे केली आहे.

चंद्रपूर जिल्हा भाजप किसान मोर्चाचे जिल्हाध्यक्ष श्री. बंडू मधुकर गौरकर यांनी शेतकऱ्यांना कृषी पंपसाठी विज जोडणी न मिळण्याच्या समस्येबाबत आमदार मुनगंटीवार यांना निवेदन दिले होते. या निवेदनाच्या अनुषंगाने श्री. मुनगंटीवार यांनी मुख्यमंत्री यांना या समस्येबाबत अवगत करीत त्वरित उपाययोजनांची मागणी केली.

‘बळीराजा कृषी विज माफी योजना’ लागू झाल्यापासून अनेक शेतकऱ्यांना नवीन कृषी पंपासाठी विद्युत जोडणी मिळालेली नाही. शेतकऱ्यांनी डिमांड भरणा करूनसुद्धा विद्युत जोडणीसाठी प्रतीक्षा करावी लागत आहे. चंद्रपूर जिल्ह्यातील बहुतांश भागात भूगर्भजल १५० फूट खोल असल्यामुळे सौरपंप अपुऱ्या ठरत आहेत. परिणामी, विद्युत पंप हीच एकमेव पर्याय आहे.

या पार्श्वभूमीवर चंद्रपूर जिल्ह्यातील शेतकऱ्यांना विशेष बाब म्हणून कृषी पंपासाठी विद्युत जोडणी तातडीने द्यावी, अशा मागणीसह आमदार मुनगंटीवार यांनी मुख्यमंत्री फडणवीस यांच्याकडे संबंधित अधिकाऱ्यांना आवश्यक निर्देश देण्याची विनंती केली आहे.

श्री. मुनगंटीवार यांनी यापूर्वीदेखील या विषयावर मुख्यमंत्री यांच्याकडे मागणी केली होती, मात्र अद्याप प्रश्न सुटलेला नाही. त्यामुळे आता यावर तातडीने कार्यवाही व्हावी, अशी शेतकऱ्यांचीही जोरदार मागणी आहे.