🌾 “पोखरा व कृषी समृद्धी योजनांतून शेतीला नवी दिशा — आमदार मुनगंटीवार” 🌾*

लोकदर्शन चंद्रपूर 👉मोहन भारती

चंद्रपूर : दिनांक 18 ऑक्टोबर 2025
राज्य सरकारच्या ‘पोखरा’ आणि ‘कृषी समृद्धी’ या अभिनव योजनांमुळे शेतीला नवसंजीवनी मिळून ती ‘मजबूरीचा नव्हे, तर मजबुतीचा व्यवसाय’ ठरेल, असा विश्वास आमदार श्री. सुधीर मुनगंटीवार यांनी व्यक्त केला.

जिल्हाधिकारी कार्यालयातील नियोजन भवन सभागृहात आयोजित आढावा बैठकीत आमदार मुनगंटीवार यांनी कृषी क्षेत्राच्या शाश्वत विकासासाठी राज्य सरकारच्या धोरणांवर सविस्तर चर्चा केली.
या वेळी जिल्हा अधीक्षक कृषी अधिकारी शंकर तोटावार, पंजाबराव देशमुख कृषी विद्यापीठाचे तज्ज्ञ डॉ. श्रीकांत अमरशेट्टीवार, डॉ. विजय काळे, डॉ. घावडे, गजानन पवार, तहसीलदार विजय पवार, बंडू गोरकार आणि मोठ्या संख्येने शेतकरी उपस्थित होते.

आमदार मुनगंटीवार म्हणाले,

> “शेतकऱ्यांच्या हातात तंत्रज्ञान पोहोचले पाहिजे. कर्मचाऱ्यांवर असलेला ताण कमी करण्यासाठी ‘वन टच इन्फॉर्मेशन’ प्रणाली विकसित केली पाहिजे. जिल्ह्यातील कृषी कार्यालयांसाठी संगणक व वाहनांची सोय करण्यात येणार आहे.”

शेतीतील यांत्रिकीकरणासाठी दरवर्षी ₹129 कोटींची तरतूद करण्यात आली असून, फवारणीसाठी ड्रोन तंत्रज्ञानाचा वापर वाढविण्याचा सरकारचा मानस आहे. तसेच, कृषी मार्गदर्शन केंद्रे, ‘मदर डेअरी’ प्रकल्प आणि 80 कोटी रुपयांचा ‘बाजारहाट’ प्रकल्प या योजनांमुळे शेतकऱ्यांच्या उत्पन्नात वाढ होईल, असे त्यांनी सांगितले.

बल्लारपूर मतदारसंघ कृषी क्षेत्रात आदर्श ठरावा, या दृष्टीने हवामान अनुकूलन आराखडा, थेट विक्री केंद्रे, प्रशिक्षण शिबिरे आणि कृषी विद्यापीठाशी समन्वय यावर भर देण्याचे आवाहनही त्यांनी केले.

> “शेती ही परंपरा आहे, पण आता ती समृद्धीची दिशा ठरवणारा व्यवसाय बनवायचा आहे,”
असे आमदार मुनगंटीवार म्हणाले.