📰 महानगरपालिका क्रीडा भवन वाचवण्यासाठी कर्मचारी एकवटले; शताब्दी वारसा जपण्याचा निर्धार

मुंबई (प्रतिनिधी – 👉गुरुनाथ तिरपणकर):

मुंबई महानगरपालिका क्रीडा भवनाच्या शंभर वर्षांच्या ऐतिहासिक वारशावर संकट ओढावल्याने महापालिका कर्मचारी, खेळाडू आणि सभासद मोठ्या संख्येने एकवटले असून “क्रीडा भवनाची ओळख पुसू नका” असा ठाम निर्धार व्यक्त करण्यात आला आहे.

२६ एप्रिल १९२६ रोजी लावलेल्या छोट्याशा रोपट्याचे आज भव्य कल्पवृक्षात रूपांतर झालेले क्रीडा भवन हे मुंबई महानगरपालिकेच्या क्रीडा परंपरेचे प्रतीक आहे. तत्कालीन महानगरपालिका आयुक्तांनी स्थापन केलेल्या म्युनिसिपल जिमखान्याच्या घटनेवरच आजही क्रीडा भवनाचे प्रशासन चालते. दर दोन वर्षांनी निवडणूक घेऊन कार्यकारिणी निवडली जाते आणि त्यामार्फत संपूर्ण कामकाज पार पडते.

क्रीडा भवनाच्या छत्राखाली कबड्डी, कॅरम, टेबल टेनिस, बॅडमिंटन, क्रिकेट, फुटबॉल, व्हॉलीबॉल, बुद्धीबळ, खो-खो, वेटलिफ्टिंग, पॉवर लिफ्टिंग, नेमबाजी, अॅथलेटिक्स, गिर्यारोहण अशा विविध खेळांचे संघ कार्यरत आहेत. या खेळाडूंनी राष्ट्रीय व आंतरराष्ट्रीय स्तरावर उल्लेखनीय कामगिरी करून मुंबई महानगरपालिकेचे नाव उज्ज्वल केले आहे.

राजेश मुदम, अनिल रासम, आत्माराम गांगर्डे, गोपीनाथ पवार यांसारख्या खेळाडूंनी स्वित्झर्लंड, जपान, जर्मनी, ब्राझील, चीन, थायलंड, स्वीडन, अमेरिका, ओमान, रोम आदी देशांत स्पर्धांमध्ये सहभागी होत पदके जिंकली आहेत. २०१६ साली श्रीलंकेत झालेल्या स्पर्धेत ७५ हून अधिक देशांतील खेळाडूंमध्ये मुंबईच्या खेळाडूंनी आपली छाप पाडली.

राष्ट्रीय स्तरावरही २०१९ (सोनपत, हरियाणा) आणि २०२२ (जालंधर, पंजाब) येथील स्पर्धांमध्ये घवघवीत यश मिळाले आहे. तसेच अर्जुन पुरस्कार, छत्रपती पुरस्कार आणि दादोजी कोंडदेव पुरस्कार विजेते अनेक दिग्गज खेळाडू या क्रीडा भवनातून घडले आहेत.

सध्या क्रीडा भवनाचे १० हजारांहून अधिक सर्वसाधारण आणि सुमारे अडीच हजार आजीव सभासद आहेत. कर्मचाऱ्यांसाठी निवास व्यवस्था देखील उपलब्ध आहे.

शताब्दी महोत्सवानिमित्त हंगामी कार्यकारिणीची निवड करण्यात आली असून अर्जुन पुरस्कार विजेत्या माया आक्रे-मेहर यांची अध्यक्षा म्हणून निवड झाली आहे. याशिवाय विविध पदांवर अनुभवी खेळाडू आणि पदाधिकारी निवडले गेले आहेत.

३० मार्च २०२६ रोजी झालेल्या सभेत काही महत्त्वाचे ठराव मंजूर करण्यात आले. त्यामध्ये क्रीडा भवनाचे शताब्दी वर्ष मोठ्या उत्साहात साजरे करणे, पुनर्विकास प्रकल्पात क्रीडा भवनाचे अस्तित्व कायम ठेवणे आणि २७ एप्रिल २०२६ रोजी शताब्दी महोत्सवाचा शुभारंभ करण्याचा निर्णय घेण्यात आला.

तसेच अखिल भारतीय आंतर महानगरपालिका क्रीडा स्पर्धा आयोजित करण्यासाठी महापौर, आयुक्त आणि इतर मान्यवरांना निवेदन देण्याचा प्रस्ताव मांडण्यात आला.

सभेत उपस्थित सर्व खेळाडू, कर्मचारी आणि सभासदांनी एकमुखाने क्रीडा भवन वाचवण्यासाठी लढा देण्याचा निर्धार व्यक्त केला. “हा केवळ एक इमारत नाही, तर शंभर वर्षांची क्रीडा परंपरा आहे. ती कोणत्याही परिस्थितीत नष्ट होऊ देणार नाही,” असा इशारा यावेळी देण्यात आला.