📰 बल्लारपूर व चंद्रपूरच्या विकास प्रश्नांवर आमदार सुधीर मुनगंटीवार यांची केंद्रीय रेल्वेमंत्र्यांकडे दमदार पाठपुरावा

लोकदर्शन दिल्ली 👉मोहन भारती

दिल्ली (प्रतिनिधी): राज्याचे माजी वने, सांस्कृतिक कार्य व मत्स्यव्यवसाय मंत्री तसेच आमदार श्री. सुधीर मुनगंटीवार यांनी केंद्रीय रेल्वेमंत्री ना. श्री. अश्विनी वैष्णव यांची दिल्ली येथे भेट घेऊन चंद्रपूर जिल्ह्यातील विविध प्रश्नांबाबत सविस्तर चर्चा केली व निवेदन सादर केले.

या निवेदनात बल्लारपूरसह चंद्रपूर जिल्ह्यातील रेल्वे-संबंधित प्रलंबित विषयांचा समावेश होता. रेल्वेमंत्र्यांनी या सर्व प्रश्नांना प्राधान्याने मार्गी लावण्याचा शब्द दिला, अशी माहिती आ. मुनगंटीवार यांनी दिली.

चर्चेदरम्यान आ. मुनगंटीवार यांनी बल्लारपूर शहरातील गोल पुलिया परिसरातील वाहतूक अडथळ्यांवर उपाय म्हणून उड्डाणपूल उभारण्याची गरज मांडली. तसेच बल्लारशा रेल्वे स्थानकाच्या सर्वांगीण विकासासाठी स्वतंत्र बैठक घेऊन प्रवाशांच्या सुविधा वाढविण्याची मागणी केली.

त्याचप्रमाणे चंद्रपूर शहरातील रेल्वे लाईनमुळे स्थलांतरित होणाऱ्या मजूर कुटुंबांच्या पुनर्वसनाचा प्रश्न, तसेच रेल्वेच्या लीजवरील जागांवर व्यवसाय करणाऱ्या व्यापाऱ्यांच्या करार नूतनीकरणाचा प्रश्न देखील त्यांनी उपस्थित केला.

या सर्व मागण्यांवर केंद्रीय रेल्वेमंत्री वैष्णव यांनी सकारात्मक प्रतिसाद देत तातडीने कार्यवाहीचे आश्वासन दिले.
बल्लारपूर आणि चंद्रपूरच्या जनतेच्या विकासाचा अजेंडा केंद्र सरकारपर्यंत पोहोचवण्याचा हा प्रयत्न फलद्रूप ठरेल, असा विश्वास आमदार मुनगंटीवार यांनी व्यक्त केला.