🌺 “सत्यशोधक कार्याची नवी दिशा – रघुनाथ ढोक यांना ‘समाज शिरोमणी’ पुरस्काराने गौरव” 🌺*

लोकदर्शन 👉 रघुनाथ ढोक

देगलूर (जि. नांदेड) :
समाजजागृती आणि सत्यशोधक विचारांच्या प्रसारासाठी कार्यरत असलेल्या समाजसेवक रघुनाथ ढोक यांना प्रज्ञा बहुउद्देशीय संस्था, अकोला (महाराष्ट्र) तर्फे देण्यात येणारा “समाज शिरोमणी पुरस्कार” प्रदान करण्यात आला. हा सन्मान 13 वे राज्यस्तरीय मराठी साहित्य संमेलन, देगलूर – 2025 मध्ये संस्थेचे सचिव व ज्येष्ठ कवी मकरंद घाणेकर यांच्या शुभहस्ते देण्यात आला.

रविवार, दि. ५ ऑक्टोबर २०२५ रोजी सिद्धेश्वर रिसॉर्ट, देगलूर येथे सकाळी ८ ते सायं. ६ या वेळेत मोठ्या उत्साहात संमेलन पार पडले. ग्रंथ दिंडी, कविसंमेलन आणि गझल गायनाने कार्यक्रमाला सांस्कृतिक रंगत चढली.
या ग्रंथदिंडीत रघुनाथ ढोक यांनी महात्मा फुले यांच्या वेशात सहभागी होऊन दिंडी स्वतःच्या खांद्यावरून संमेलन स्थळी नेली. त्यांच्या या प्रतीकात्मक भूमिकेमुळे वातावरण भारावून गेले आणि अनेकांनी त्या क्षणाचे छायाचित्र टिपले.

समाजशिरोमणी पुरस्काराच्या निवडीमागचे कारण स्पष्ट करताना आयोजक म्हणाले की,

> “आजच्या विज्ञानयुगात अंधश्रद्धा, मुहूर्त आणि कर्मकांड यांच्या जाळ्यात अनेक कुटुंबं अडकलेली आहेत. अशा काळात रघुनाथ ढोक यांनी महात्मा फुले यांच्या विचारधारेवर आधारित सत्यशोधक विधी करून समाजाला वैज्ञानिकतेचा आणि विवेकाचा नवा मार्ग दाखवला आहे.”

गेल्या पाच वर्षांत रघुनाथ ढोक यांनी महाराष्ट्र आणि तेलंगणा राज्यांत ५३ सत्यशोधक विवाह, १५ गृहप्रवेश व वास्तू विधी आणि अनेक प्रबोधनात्मक सामाजिक उपक्रम पूर्णतः नि:स्वार्थ भावनेने पार पाडले आहेत. त्यांच्या कार्यामुळे समाजातील अंधश्रद्धा कमी होण्यास आणि लोकांचा वेळ व पैसा वाचविण्यास हातभार लागला आहे.

सन्मान स्वीकारताना रघुनाथ ढोक म्हणाले —

> “या ‘समाजशिरोमणी’ पुरस्कारामुळे मानसिक आनंदाबरोबरच जबाबदारीही वाढली आहे. सत्यशोधक चळवळीचे कार्य देशभर पोहोचविण्याचा आणि प्रज्ञा संस्थेची सामाजिक दृष्टी पूर्ण करण्याचा माझा निश्चय आहे.”

कार्यक्रमास मुंबईचे ज्येष्ठ कवी बाबा ठाकूर, फलटणचे डॉ. सुधाकर बेंद्रे तसेच संस्थापक कवयित्री सौ. लीनाताई देगलूरकर यांची उपस्थिती लाभली.
कार्यक्रमाचे सुत्रसंचालन कवी मकरंद हळदणकर यांनी तर आभार प्रदर्शन कवी अनिल कुलकर्णी यांनी केले.

🪔 सत्यशोधक विचारांनी उजळलेल्या या कार्यकर्त्याचा प्रवास समाजाला विचारप्रवृत्त करणारा आहे. ‘समाज शिरोमणी’ पुरस्कार त्यांच्या कार्याचा गौरव नसून, नव्या सामाजिक क्रांतीचा प्रारंभ आहे.