🚨 “शेतकरी उपासमारीच्या उंबरठ्यावर; तात्काळ सरसकट आर्थिक मदत द्या!” – कोरपना तालुका काँग्रेस कमिटीचा तहसीलदारांना इशारा

लोकदर्शन👉अशोककुमार भगत

कोरपना :दिनांक आक्टोबर
कोरपना तालुका काँग्रेस कमिटीच्या वतीने तहसीलदारांना निवेदन सादर करून शेतकऱ्यांना तात्काळ सरसकट आर्थिक मदत देण्याची जोरदार मागणी करण्यात आली. गेल्या तीन महिन्यांपासून सुरु असलेल्या सततच्या अतिवृष्टीमुळे कापूस, सोयाबीन आणि इतर पिकांचे प्रचंड नुकसान झाले असून, शेतकरी गंभीर आर्थिक संकटात सापडले आहेत.

निवेदनात नमूद केल्यानुसार, कापसाच्या झाडांना लागलेली बोंडे पूर्णपणे खराब झाली आहेत, तर सोयाबीनला शेंगा न भरल्याने उत्पादन खर्चसुद्धा निघत नाही. त्यामुळे शेतकरी उपासमारीच्या उंबरठ्यावर पोहोचले असून, शासनाने तात्काळ मदत न दिल्यास परिस्थिती बिकट होईल, असा इशारा काँग्रेस कमिटीने दिला आहे.

हे निवेदन तालुका काँग्रेस कमिटीचे अध्यक्ष श्री. उत्तम पेचे यांच्या नेतृत्वाखाली देण्यात आले. यावेळी श्याम रणदिवे, भाऊराव पा. चव्हाण, प्रशांत लोडे, रमेश मेश्राम, शगीर भाई, यादव दरने, सुरेश पा. मालेकर, सचिन मालेकर, राहुल मालेकर, अनिल गोंडे, मोतीराम पा. सोयाम, विलास आडे, शंकर पा. पेचे, मिलिंद ताकसांडे, सुनील कोहचाडे यांच्यासह अनेक शेतकरी व पदाधिकारी मोठ्या संख्येने उपस्थित होते.

काँग्रेस कमिटीच्या या आक्रमक निवेदनामुळे प्रशासनासमोर शेतकऱ्यांच्या प्रश्नांवर तातडीने निर्णय घेण्याचे आव्हान उभे ठाकले आहे.