🌸 समाज शिरोमणी पुरस्काराने सत्यशोधक कार्यकर्ते रघुनाथ ढोक सन्मानित 🌸

लोकदर्शन पुणे 👉राहुल खरात

पुणे/नांदेड :दिनांक 3 ऑक्टोबर 2025
प्रज्ञा बहुउद्देशीय संस्था, अकोला, महाराष्ट्र तर्फे आयोजित १३ वे राज्यस्तरीय मराठी साहित्य संमेलन – देगलूर २०२५ हे रविवार, दि. ५ ऑक्टोबर रोजी सकाळी १० ते सायं. ५.३० या वेळेत सिद्वेश्वर लॉन्स, देगलूर, जि. नांदेड येथे होणार आहे.

या संमेलनात पुणे येथील समाजसेवक व सत्यशोधक कार्यकर्ते रघुनाथ ढोक यांना “समाज शिरोमणी पुरस्कार–२०२५” मान्यवरांच्या शुभहस्ते प्रदान करण्यात येणार आहे.

समाजातील अंधश्रद्धा, कर्मकांड, जातीय बंधने याविरोधात आणि सत्यशोधक विवाह, गृहप्रवेश, वास्तूशांती व इतर विधी मोफत करून लोकांना प्रबोधन देण्याचे कार्य श्री. रघुनाथ ढोक यांनी महाराष्ट्र व तेलंगणा राज्यात गेल्या अनेक वर्षांत केले आहे. त्यांच्या या कार्यामुळे सत्यशोधक चळवळीला पुनर्जिवन मिळाले असून समाजात परिवर्तनाची नवी लाट निर्माण झाली आहे.

तसेच साहित्य क्षेत्रातही त्यांचे भरीव योगदान आहे. त्यांनी सावित्रीबाई फुले गीतचरित्र, दिनांची साऊली, जर्मन फोर कलर पुस्तके यांसह अनेक ग्रंथ प्रकाशित केले आहेत. गेल्या ३४ वर्षांपासून ते सामाजिक, शैक्षणिक व सहकार क्षेत्रात सक्रिय कार्यरत आहेत.

संमेलनाचे उद्घाटन, अध्यक्षीय भाषण व विविध सत्रांसाठी सौ. लीनाताई देगलूरकर, डॉ. संगीता आवचार, अनिल कुलकर्णी, ह.भ.प. राजेश महाराज देगलूरकर, किशोरकुमार मिश्रा, डॉ. सुधाकर बेंद्रे, मा. रविंद्र यशवंतराव, मकरंद घाणेकर, डॉ. दिलीप नेवसे, डॉ. शैलेंद्र भणगे यांसह अनेक मान्यवर उपस्थित राहणार आहेत.

👉 रघुनाथ ढोक यांचा सन्मान म्हणजे सत्यशोधक विचारसरणीला मिळालेली प्रेरणा आणि समाजपरिवर्तनाच्या वाटचालीतील मोठे पाऊल मानले जात आहे.