*🌸 “सुधीर मुनगंटीवार हेच खरे विकासपुरुष” – अभिनेत्री प्राजक्ता माळी* *“♦️चंद्रपूर जिल्ह्याचा देशाला हेवा वाटावा असा विकास केला”*

*लोकदर्शन 👉 मोहन भारती*

मुल : मुल येथे आयोजित ‘भाऊंचा गरबा महोत्सवा’ ला भेट देताना सुप्रसिद्ध अभिनेत्री व ‘महाराष्ट्राची हास्यजत्रा’ फेम प्राजक्ता माळी यांनी राज्याचे माजी वने, सांस्कृतिक कार्य व मत्स्यव्यवसाय मंत्री आ. सुधीर मुनगंटीवार यांच्या कार्याचा गौरव केला.

त्यांनी आपल्या भाषणात म्हटले – *“आ. सुधीर मुनगंटीवार* यांनी चंद्रपूर जिल्ह्यात असा विकास केला आहे की तो संपूर्ण देशाला हेवा वाटावा असा आहे. *ताडोबा,* *बॉटनिकल गार्डन,* *टाटा कॅन्सर* हॉस्पिटल, मेडिकल कॉलेज अशा सर्व स्तरांवर त्यांनी भरीव कामगिरी केली आहे. महिला सक्षमीकरणासाठी केलेल्या त्यांच्या उपक्रमांमुळे मला प्रचंड प्रेरणा मिळाली आहे. या शहरातील चौपदरी सिमेंटचे रस्ते, सुंदर नाट्यगृह, जलतरण तलाव, क्रीडा संकुल, सिंचन सुविधा ही मुनगंटीवार यांच्या दृष्टीकोनातून साकारलेली पायाभूत कामे आहेत. खरंच, ते खरे विकासपुरुष आहेत.”

त्यांनी पुढे सांगितले – “आमदार मुनगंटीवार यांच्यासोबत माझी पहिली भेट नागपूरात झाली होती. त्यांनी छत्रपती शिवाजी महाराज आणि माॅं जिजाऊंवर दिलेले भाषण ऐकून मी थक्क झाले. इतिहासाचा इतका दांडगा अभ्यास असलेला नेता मी पहिल्यांदा पाहिला. फक्त बोलण्यात नव्हे, तर कृतीतूनही त्यांनी उदाहरण घालून दिलं – शिवरायांची वाघनखं लंडनहून मातृभूमीत परत आणून त्यांनी दाखवलेली देशभक्ती हेच त्यांचं खरं व्यक्तिमत्त्व आहे. या जिल्ह्याचे नेतृत्व मुनगंटीवार यांच्यासारख्या नेत्याकडे आहे, हे इथल्या लोकांचे भाग्य आहे. मला मात्र या बाबतीत तुमचा हेवा वाटतो.”

*गरिबांच्या चेहऱ्यावरील आनंद हेच माझ्या कामाचे समाधान – आ. सुधीर मुनगंटीवार*

या प्रसंगी आमदार मुनगंटीवार यांनी आपल्या भाषणात जनतेशी भावनिक संवाद साधला. ते म्हणाले – “नवरात्रोत्सव हा आनंदाचा आणि सकारात्मकतेचा उत्सव आहे. पण केवळ आपल्या चेहऱ्यावर हास्य उमटून चालणार नाही, तर आपल्या कृतींमुळे वंचित आणि गरीबांच्या चेहऱ्यावर हास्य उमटलं पाहिजे. गरिबांच्या चेहऱ्यावरचा आनंद हेच माझ्या कार्याचे खरे समाधान आहे.”

ते पुढे म्हणाले – *“चंद्रपूर जिल्हा केवळ सोनं दान करणारा नाही, तर सोन्यासारख्या लोकांचा आहे*. याच भूमीत कर्मवीर स्व. मा.सा. कन्नमवारांनी देशासाठी योगदान दिलं. हाच वारसा पुढे नेत मी माझ्या मतदारसंघाचा विकास करण्याचा प्रयत्न करीत आहे.”

महोत्सवात मान्यवरांची उपस्थिती

या कार्यक्रमाला अभिनेत्री प्राजक्ता माळी प्रमुख पाहुण्या म्हणून उपस्थित होत्या. सोबत भाजपा जिल्हाध्यक्ष हरीश शर्मा, माजी जिल्हा परिषद अध्यक्ष संध्याताई गुरनुले, महाराष्ट्र निसर्ग पर्यटन विकास मंडळ सदस्य प्रकाश धारणे, रत्नमाला भोयर, नंदू रणदिवे, प्रभाकर भोयर, हरीश ढवस, चंद्रकांत आष्टणकर, अखिल गांगररेड्डीवार, अमोल चुदरी, प्रशांत बोबाटे, सूरज मांदाडे, रुपेश निकोडे, राकेश ठाकरे, विद्या बोबाटे, भावना चौखुंडे यांसह मोठ्या संख्येने भाजपा पदाधिकारी व कार्यकर्ते उपस्थित होते.

महोत्सवाचे उत्तम नियोजन करून कार्तिकी प्रभाकर भोयर आणि जान्हवी नंदू रणदिवे यांनी जबाबदारी पार पाडली, त्यांचे कौतुक आमदार मुनगंटीवार यांनी केले.