🌹 फुले एज्युकेशन तर्फे 54 वा सत्यशोधक आंतरजातीय विवाह संपन्न! ♦️अंधश्रद्धा व कर्मकांडाला तिलांजली; बलिप्रतिपदेच्या शुभदिनी साधेपणाने समाजप्रबोधनाचा आदर्श

धायरी (पुणे) 👉रघुनाथ ढोक

फुले शाहू आंबेडकर एज्युकेशनल अँड सोशल फाउंडेशनच्या धायरी फाटा येथील बहुउद्देशीय सत्यशोधक केंद्रातर्फे बलिप्रतिपदेच्या शुभदिनी सायं. ७ वाजता एक आगळावेगळा व समाजप्रबोधन करणारा विवाह सोहळा संपन्न झाला.

अल्पशिक्षित सत्यशोधक सागर नागेश नाशिककर आणि सत्यशोधिका भाग्यश्री सोमनाथ कर्डक यांचा हा आंतरजातीय विवाह कुटुंब मान्यतेने, अंधश्रद्धा व कर्मकांडाला तिलांजली देत, अत्यंत साधेपणात आणि अल्पखर्चात पार पडला.

विवाह प्रसंगी वधू–वरांना संस्थेचे अध्यक्ष व विधीकर्ते तसेच महात्मा फुले साहित्य चरित्र साधने व प्रकाशन समिती महाराष्ट्र शासनाचे नि.सदस्य सत्यशोधक रघुनाथ ढोक आणि राष्ट्रीय ओबीसी महासंघाचे विश्वस्त प्रा. सुदाम धाडगे यांच्या हस्ते सत्यशोधक विवाह प्रमाणपत्र तसेच महात्मा फुले–सावित्रीबाई फुले यांची चित्रफ्रेम, भांडी, मिक्सर, कपडे, डबे, चौरंग आदी संसारोपयोगी साहित्य भेट देण्यात आले.
निवृत्त शिक्षिका सुधा धाडगे यांनीही संसारोपयोगी साहित्य मोफत भेट दिले.

कार्यक्रमाच्या सुरुवातीला वधू–वरांनी संविधान आणि महात्मा फुले समग्र वाङ्मय हातात घेऊन फुलांच्या पायघड्यावरून आगमन केले. त्यानंतर महात्मा फुले व सावित्रीबाई यांच्या पुतळ्यांना पुष्पहार अर्पण करण्यात आला.

आयोजक व विधीकर्ते रघुनाथ ढोक यांनी या प्रसंगी सत्यशोधक चळवळीचा इतिहास, सार्वजनिक सत्यधर्माची स्थापना आणि महात्मा फुले यांच्या कार्याचा सामाजिक संदर्भ स्पष्ट केला. त्यांनी सांगितले की, “आजपर्यंत फुले एज्युकेशन संस्थेतर्फे महाराष्ट्र व तेलंगणा राज्यात मिळून ५४ सत्यशोधक विवाह आणि १५ वास्तूपूजन सोहळे पार पडले आहेत.”

प्रा. सुदाम धाडगे यांनी महात्मा फुले रचित मंगलाष्टकांचे गायन करून विवाह विधी मंगलमय केला. विवाहाच्या वेळी रघुनाथ ढोक यांनी वर–वधूंकडून सात वचने व शपथपत्र वाचन करून घेतले.

कार्यक्रमात सामाजिक कार्यकर्ते किशोर भास्कर, सौ. पूनम आवळे, धोंडाबाई क्षीरसागर व इतर मान्यवर उपस्थित होते. आयोजनात आकाश व क्षितिज ढोक तसेच सौ. उर्मिला क्षीरसागर यांचे मोलाचे सहकार्य लाभले.

या प्रसंगी वर–वधूंच्या मातांना राष्ट्रीय ओबीसी महासंघातर्फे सन्मानपत्र देण्यात आले.

समारोप प्रसंगी केंद्राच्या व्यवस्थापिका सत्यशोधिका आशा ढोक यांनी आभार मानताना म्हटले —
“समाजात आर्थिक उधळपट्टी, अंधश्रद्धा व कर्मकांड याला तिलांजली देऊन साधेपणाने सत्यशोधक विवाह व्हावेत, हा आमचा उद्देश आहे. अशा समाजहितार्थ विवाहांना प्रोत्साहन देण्यासाठी आमची संस्था देशभर मोफत कार्य करत राहील.”