🌹 खारेपाटण ज्युनिअर कॉलेजमध्ये शिक्षक दिन साजरा — जनजागृती सेवा संस्थेतर्फे प्राध्यापकांचा सन्मान

लोकदर्शन.👉गुरुनाथ तिरपणकर

खारेपाटण (प्रतिनिधी – गुरुनाथ तिरपणकर) : भारताचे माजी राष्ट्रपती व तत्त्वज्ञ भारतरत्न डॉ. सर्वपल्ली राधाकृष्णन यांच्या जयंतीनिमित्त दरवर्षी ५ सप्टेंबरला शिक्षक दिन साजरा केला जातो. याच औचित्याने जनजागृती सेवा संस्था (रजि.), ठाणे यांच्या वतीने उद्योगश्री. प्र. ल. पाटील ज्युनिअर कॉलेज, खारेपाटण (ता. कणकवली, जि. सिंधुदुर्ग) येथील प्राध्यापकांचा शाल, भेटवस्तू आणि सन्मानपत्र देऊन सत्कार करण्यात आला.

या सोहळ्यास जनजागृती सेवा संस्थेचे संस्थापक अध्यक्ष श्री. गुरुनाथ तिरपणकर, खजिनदार मा. दत्ता कडूलकर, सेवानिवृत्त शिक्षण विस्तार अधिकारी श्री. भास्कर गुरसाळे, कलादिग्दर्शक व गायक श्री. शशिकांत कांबळी तसेच पंचक्रोशी शिक्षण प्रसारक मंडळाचे अध्यक्ष श्री. प्रविण लोकरे प्रमुख पाहुणे म्हणून उपस्थित होते.

संस्थेचे अध्यक्ष श्री. गुरुनाथ तिरपणकर यांनी आपल्या मनोगतात संस्थेच्या सामाजिक व शैक्षणिक कार्याचा आढावा घेतला. २०२१ मध्ये स्थापना झाल्यापासून संस्थेने शैक्षणिक उपक्रम, सेवाभावी उपक्रम तसेच कोरोना काळात आर्थिक मदत करून सामाजिक जबाबदारी पार पाडली असल्याचे त्यांनी सांगितले.

या समारंभात प्राचार्य श्री. संजय सानप, पर्यवेक्षक श्री. संतोष राऊत, तसेच सर्व प्राध्यापक व सहाय्यक शिक्षकांचा सन्मान करण्यात आला. विशेष म्हणजे SET परीक्षेत यश मिळवल्याबद्दल श्री. ऋषिकेश सानप यांचा शाल-श्रीफळ व सन्मानचिन्ह देऊन गौरव करण्यात आला.

कार्यक्रमाचे सूत्रसंचालन प्रा. अजय गुरसाळे यांनी केले तर आभार प्रदर्शन संस्थेचे खजिनदार दत्ता कडुलकर यांनी मानले. शिक्षकांच्या गौरवाने खारेपाटण पंचक्रोशी शिक्षण मंडळाच्या परिसरात उत्साहाचे वातावरण निर्माण झाले होते.