🎓 विद्यार्थ्यांच्या नेतृत्वगुणांना वाव : विदर्भ महाविद्यालय जिवतीत इतिहास व वनस्पतीशास्त्र विभागातर्फे ‘स्वयंशासन उपक्रम’

लोकदर्शन जिवती 👉प्रा. गजानन राऊत

जिवती : विद्यार्थ्यांमध्ये दडलेली सुप्त क्षमता आणि अंतर्भूत प्रतिभेला वाव देण्यासाठी तसेच आत्मविश्वास वृद्धिंगत करून नेतृत्वगुण व संघटनकौशल्यांना चालना मिळावी या उद्देशाने, शिक्षक दिनाचे औचित्य साधून विदर्भ महाविद्यालय, जिवतीच्या इतिहास विभाग आणि वनस्पतीशास्त्र विभागातर्फे ‘स्वयंशासन उपक्रम’ उत्साहात साजरा करण्यात आला.

या उपक्रमात विद्यार्थ्यांनी स्वयंशासनाची जबाबदारी स्वीकारत अध्यापन, अध्ययन, प्रशासकीय आणि सांस्कृतिक कामगिरी समर्थपणे पार पाडली. शिक्षकांचा आदर्श डोळ्यासमोर ठेवून विद्यार्थ्यांनी जबाबदाऱ्या शिताफीने पार पाडत आत्मविश्वासाचे उत्तम दर्शन घडविले.

परीक्षणाअंती कु. पल्लवी कांबळे व उर्मिला राठोड यांनी प्रथम क्रमांक पटकावला, कु. महेश्वरी वारे हिने द्वितीय क्रमांक मिळविला तर प्रेम चव्हाण याने तृतीय क्रमांकाचा मान मिळविला. कु. वैष्णवी चव्हाण हिला प्रोत्साहनपर गौरव मिळाला. विजेत्यांना रोख पारितोषिक व प्रमाणपत्र देऊन सन्मानित करण्यात आले.

या प्रसंगी प्राचार्या डॉ. एस. एच. शाक्य यांनी विद्यार्थ्यांना मार्गदर्शन करताना सांगितले की, “स्वयंशासन उपक्रम विद्यार्थ्यांना जबाबदारीची जाणीव करून देतो, नेतृत्वगुणांना चालना देतो आणि सर्वांगीण विकास साध्य करतो.” तर आयोजक डॉ. श्रीकांत पानघाटे यांनी या उपक्रमामुळे विद्यार्थ्यांमध्ये सामाजिक जाणीव आणि आत्मविश्वास वृद्धिंगत होऊन सर्वांगीण प्रगती साधली जाईल, असे प्रतिपादन केले.

उपक्रमाचे संयोजन प्रा. सचिन शिंदे, डॉ. वैशाली डोर्लीकर व प्रा. संजय मुंडे यांनी केले, तर परिक्षणाची जबाबदारी प्रा. गणेश कदम आणि प्रा. सुमित रहाटे यांनी पार पाडली. दिवसभर उत्साही वातावरणात झालेल्या या उपक्रमाने शिक्षक दिन संस्मरणीय ठरला.